सहयोगी कृषक समुहके सामाजिक परिक्षण तथा अनुगमन

पहुरा समाचारदाता
हसुलिया,११ भदौ । सहयोगी हातरुको समुह (सहास) नेपालसे ‘स्थानीय प्रयासमा खाद्य सुरक्षा रुपान्तरण (लिफ्ट) परियोजना अन्र्तगत गठन हुइल सहयोगी कृषक समुहमे सामाजिक परिक्षण ओ पालिकास्तरीय संयूक्त अनुगमन कैगिल बा ।

कैलारी गाउँपालिका वडा नम्बर ४ ‘के गाउँ’ खल्ला चौधरी तोलमे गठन उ समुहके सोम्मारके रोज गाउँपालिका उपाध्यक्ष भगवतीकुमारी चौधरीके नेतृत्वमे सामाजिक परिक्षण ओ पालिकास्तरीय संयूक्त अनुगमन हो ।

उहे कार्यक्रममे बोल्टी गाउँपालिका उपाध्यक्ष भवगतीकुमारी चौधरी थारु समुदायसे पहिलेसे टिना खेती करटी आइल, मने व्यावसायिक बने नइसेकल बटैली । खाद्य सुरक्षाके लाग अपने उत्पादित टिना खैना ओ विक्री करके आयस्रोतमे बृद्धि करेक लाग सहास नेपाल ओ गाउँपालिकाके समन्वयमे सहयोगी कृषक समुहहे डगर डेखैटी रहल बटैली ।

हमार थेन टिना लगाई भरिक जग्गा परली बा, उहाँ कहली, ‘घरे खाली बैठना ओ भारतसे नानके टिना खैनासे मजा अपने उत्पादन कैना जरुरी बा । भारतसे नानल टिनामे टमान विषादी प्रयोग करल रहठ जिहीसे हमारमे मेरमेराइक रोग लागठ । अपनही उत्पादन कैके घरे खैना ओ विक्री कैलेसे दुई चार रुप्या आम्दानी हुइठ ।’

उहाँ कहली, ‘समुहसे करल काम ओ भावी योजना सह्रनिय रहल बा । दानपेटिकाफे सुरुवाट करल बा । यिहीसे आम्दानी बह्रैटी जैना ओ पैसा नइरहल बेला विउ विजन खरिद करेसेक्जाई ।’ समुहसे टिना संकलन केन्द्र संचालन कैडेना माग अनुसार सहयोग कैना उहाँ बटैली ।

विषादीहे प्रयोगहे हटैटी जैविक मलके प्रयोग बह्रैना उहाँ आग्रह करली । विषादीके कारण माटीक उर्बरा शक्ति नष्ट हुइनाके साथे माटीमे रना जीवफे लोप हुइटी गैल उहाँ बटैली । संस्था आज सहयोग करल काल्हके दिनमे संस्थाके कार्यक्रम ओराइ सेकठ, सहास, कैलारी गाउँपालिका आज एक ठो तरिका सिखाडि मने समुहहे सक्रिय बनैलेसे पाछेसम आम्दानी करेसेक्ना उपाध्यक्ष बटैली ।

सहयोगी कृषक समुहके अध्यक्ष जानकी चौधरी समुहसे एक बरषभिटर कैगिल गतिविधि ओ प्रगतिबारे जानकारी डेहल रहिट । यी समुह गैल बरसके पुस १८ गते दर्ता हुइल उहाँ बटैली । यहाँ २६ जानेक सदस्य रहल, १२ जाने टिना खेती सुरुवाट कैगिल बा । एकल महिला, गरिव, विपन्न महिलाहे छानके समुह बनाइल उहाँ बटैली । समुहहे सहास नेपालसे टिना खेती तालिम पश्चात व्यावसायिक टिना खेती सुरुवाट कैगिल उहाँ बटैली । सहास नेपालसे समुहहे १२ ठो टनेल थोपा सिचाईसहित, ३५ थान क्रेट, जैविका विगादी बनाइक लाग करिया ड्रम २६, पानी मोटर २ थो, एक ठो खानेपानी नल्का सहयोग पाइल अध्यक्ष बटैली ।
फलफुलके टेलुवा, उन्नत जातके विउ आइलपाछे उत्पादन करके विक्रीपाछे घर खर्चके कुछ सहयोग पुगल बटैली । घारी ओ बंगुरके खोर सुधारके लाग १४ जानेक योजना बनाइलमे ४ जानेक घर सुरुवाट हुइल उहाँ बटैली ।

समुहमे मुठी दान अभियान सुरुवाट करल, भावी योजनामे टिना संकलन केन्द्र, टिना खेती व्यापाक बनैना, पालिकासे दुई थान पानीमोटर, शुद्ध खानेपानीके लाग ४ ठो नल्का, अब्बे १२ ठो टनेलमे टिना खेती सुरुवाट करल ओ ठप सहयोग हुइलेसे खल्ला टोलमे टिना व्लक क्षेत्रमे रुपमे आघे बह्रैना योजना रहल बटैली ।

राशयानिक विषादी हटैटी जैविक विषादीके सुरुवाट करल, गाउँघरमे रहल बालविवाह मुक्त टोल, अपन परम्परा संस्कृति जोगैना अभियानमे लागल बटैली । उहाँ यी बरस लोप हुइल कठघोरी नाँच सुरुवाट करल बटैली ।

वडा नम्बर ४ के वडा अध्यक्ष ठागुराम चौधरी सहास नेपाल और वडामे गतिविधि संचालन करल मने यी वडाके कृषक समुह सक्रिय रहल बटैलै । उहाँ वडा कार्यालयसे समुहहे आघे बह्राइक लाग सहयोग करटी आइल ओ अइना दिनमे आवश्यकताके आधारमे सहयोग कैना प्रतिवद्धता जनैलै ।

कार्यक्रममे कैलारी गाउँपालिकाके सामाजिक विकास शाखा प्रमुख यगम कलेल भारतीय आके हमारे भुमि टिना टावान कैके ढेर रुप्या लैजैना मने नेपालीहुक्रे मेहनत नइकरल डेखल बटैलै ।

उहाँ कहलै, मोर अनुभव बा, यहाँ कोई संघसंस्था वा सरकारसे अनुदानमे सहयोग करल टबसम समुह चल्ना नइटे निष्कृय हुजैना परिपाटी बा । कैलारी–४ मे सहास नेपाल डगर देखैले बा । अपनेहुक्रे डगरमे नेग्लेसे पाछे आम्दानी करे सेकबी । निष्कृय हुइबी कलेसे समुहफे ओराजाई । उहाँ सहयोगी कृषक समुहहे भारी बनैटी सहकारीके रुपमे आघे बह्रैना आग्रह करलै ।
पशु शाखा प्रमुख सूर्य प्रसाद चौधरी टिना खेतीके व्यावसायिक बनैटी लेखाजोख धरले आम्दानी खर्च पत्ता लग्ना बटैलै । कार्यक्रममे समुहके सल्लाहकार तथा गाउँक भल्मन्सा जगलाल चौधरी टिना खेती संग्गे वडा नम्बर ४ ‘के गाउँ’ खल्ला चौधरी तोलमे होमस्टे संचादनके तयारी करटी रहल बटैलै ।

कार्यक्रममे सहजीकरण तथा कार्यक्रमबारे जानकारी सहयोगी हातरुको समुह (सहास) नेपालसे परियोजना अधिकृत नरेश चौधरी डेहल रहिट । यिहे अवसरमे समुहसे कैगिल टिना खेती अनुगमन ओ घारी, बंगुरके खोर सुधारकेफे अनुगमन कैगिल रहे ।

कार्यक्रममे कैलारी गाउँपालिकाके उपाध्यक्ष भगवतीकुमारी चौधरी, प्रमुख प्रशासकीय अधिकृत विरबहादुर ऐर, सामाजिक शाखा प्रमुख यगम कलेल, शिक्षा शाखा प्रमुख गणेशप्रसाद मिश्र, स्वास्थ्य शाखा प्रमुख नरेशकुमार चौधरी, पशु शाखा प्रमुख सूर्यप्रसाद चौधरी, कृषि शाखाके नाप्रास बसन्ती चौधरी, विपद शाखा प्रमुम भुवन बखरिया, सहयोगी हातरुको समुह (सहास) नेपालसे परियोजना अधिकृत नरेश चौधरी, कृषि प्राविधिक नरबहादुर जिरेल, कृषि प्राविधिक नवराज चौधरी, स्वास्थ्य प्राविधिक माया चौधरी,वन प्राविधिक विप्लव चौधरी, वित्तीय तथा प्रशासनिक सहायक सुनिता चौधरी, समुहके सदस्यहुकनके सहभागिता रहल रहे । उ परियोजना ब्रोटके आर्थिक सहयोगमे लागु हुइल बा ।