धनगढीमे खुल्ला डेउडा प्रतियोगिता सुरु

पहुरा समाचारदाता
धनगढी, १४ भदौ । सुदूरपश्चिम गौरा महोत्सव तथा प्रादेशिक खुल्ला डेउडा प्रतियोगिताके सुरु हुइल बा ।

सुदूरपश्चिम सरकारके सामाजिक विकास मन्त्री झपटबहादूर साउँदके प्रमुख आथित्यतामे प्रतियोगिताके उदघाटन हुइल हो । सुदूरपश्चिम प्रज्ञा प्रतिष्ठान ओ डेउडा प्रतिष्ठानके संयुक्त आयोजनामे सुदूरपश्चिम गौरा महोत्सव तथा प्रादेशिक डेउडा प्रतियोगिता भदौ १४ ,१५ ओ १६ गते धनगढी उपमहानगरपालिकाके प्राङणमे सञ्चालन कैना डेउडा प्रतिष्ठानके अध्यक्ष दलबहादूर बोगटी बटैले ।

‘भाषा, साहित्य,कला ओ संस्कृतिके संरक्षण कैना हमार दायित्व हो ।’ कना मुल नाराके साथ २०७३ सालसे निरन्तर करटी आइल ओ २०८० मे ८ औं पटक कैना लागल डेउडा प्रतिष्ठानके महासचिव तोयाप्रसाद भट्ट बटैले ।

डेउडा प्रतियोगितामे पहिल हुइना नगद २१ हजार, द्वितीयहे नगद १५ हजार, तृतीयहे नगद ९ हजार ओ सान्त्वनाहे नगद ५ हजारके साथे प्रमाणपत्र प्रदान कैना बा । हरेक दिन एक जाने उत्कृष्ट डेउडियाहे नगद पुरस्कारफे प्रदान कैना प्रज्ञा प्रतिष्ठानके उपकुलपति डा. टिएन जोशी बटैलै ।