ब्रहमाकुमारीसे रक्षाबन्धन तथा विमारीहुकनहे फलफूल वितरण
पहुरा समाचारदाता
धनगढी, १४ भदौ । ब्रहमाकुमारी ईश्वरीय विश्व विद्यालय नेपाल क्षेत्रीय प्रशिक्षण केन्द्र कैलालीसे विफेक रोज रक्षाबन्धन ओ सेती प्रादेशिक अस्पतालके विमारीहुकनहे फलफूल वितरण कार्यक्रम कैगिल बा ।
ब्रहमाकुमारी ईश्वरीय विश्व विद्यालय नेपाल क्षेत्रीय प्रशिक्षण केन्द्र कैलालीके संचालिका ब्रहमाकुमारी हिरा डिडी ओ सहसंचालिका दुर्गा बहिनीयालगायतसे सुदूरपश्चिम प्रदेशके उद्योग पर्यटन वन तथा वातावरण मन्त्री रमेश धामी, पूर्व सामाजिक विकास राज्य मन्त्री टेकबहादुर रैका, कैलालीके प्रमुख जिल्ला अधिकारी यूवराज कट्टेल, सहायक प्रजिअ यज्ञराज जोशीलगायतहे रक्षाबन्धन बाँधल रहिट ।
कार्यक्रममे ब्रहमाकुमारी हिरा डिडी रक्षाबन्धन पवित्रता, सुख, शान्ति आत्मिक प्रेम, सदभाव भैया बहिनीयाके पवित्र स्नेहके प्रतिक रहल बटैली । ओस्टेक करके ब्रहमाकुमारी ईश्वरीय विश्व विद्यालयसे सेती प्रादेशिक अस्पतालमे विमारीहुँक्रनहे फलफूल वितरण कैना साथे रक्षाबन्धनफे बाँधगिल बा ।
सेती प्रादेशिक अस्पतालमे १९० जाने विमारी, नोभा अस्पतालमे ३५ जाने विमारीनहे ओ आमाको माया छात्रबासमे २५ जनहनहे फलफुल वितरण संगे रक्षाबन्धन बाँधल ब्रहमाकुमारी ईश्वरीय विश्व विद्यालय नेपाल क्षेत्रीय प्रशिक्षण केन्द्र कैलालीके महेन्द्र खनाल बटैलै ।
सत्ययुगमे दानवसे रखेडल देवगणहे गुरु बृहस्पतिसे रक्षा विधान तयार करके बलशाली दानवराज बली बाँधलै, टबमारे मै टुहिन बाँधम, यिसे टु सुरक्षित बनो तथा विचलित नहोऊ कहिके डोरी बाँधके जोगाइल रहिट कना पौराणिक मान्यताके आधारमे चलल रक्षाबन्धनके परम्परा आज फे प्रचलित बा । आजके दिन तागाधारीसे अपन जनै (यज्ञोपवीत) फेरठै । सप्तऋषि कश्यप, अत्रि, भारद्वाज, गौतम, जमदग्नि, वशिष्ठ ओ विश्वामित्रहे तर्पण डेना हुइल ओरसे यी दिनहे ऋषि तर्पणीफे कना करठै ।
