सुदूरपश्चिममे एक महिनामे ३०८ जहनमे डेंगु संक्रमण

कैलाली नम्बर वानमे, प्रदेशमे संक्रमितके संख्या ६३५ पुगल

पहुरा समाचारदाता
धनगढी, १४ भदौ । सुदूरपश्चिम प्रदेशमे एक महिनामे ३ सय ८ जनहनमे डेंगुरोग संक्रमण डेखल बा ।

सुदूरपश्चिम प्रदेश सामाजिक विकास मन्त्रालय स्वास्थ्य निर्देशनालय डोटीसे सार्वजनिक कैगिल दैनिक रिपोर्ट अनुसार अगष्ट महिनामे सबसे ढेर जनहनमे डेंगुरोग संक्रमण डेखल हो । सामाजिक विकास मन्त्रालय स्वास्थ्य महाशाखा प्रमुख नरेन्द्रसिंह कार्की सुदूरपश्चिम प्रदेशके कैलाली जिल्लामे संक्रमण बृद्धिदर ह्वाट बह्रल कहटी सबसे ढेर जोखिम रहल बटैलै ।

नौ जिल्ला मन्से कैलाली अब्बे नम्बर वानमे रहल कहटी अगष्ट महिनामे केल १६९ जनहनमे डेंगुरोग पुष्टि हुइल महाशाखा प्रमुख कार्की जनैलै । यी जिल्लामे जुलाई महिनामे जम्मा १६ जनहनमे संक्रमण हुइल रहे ।

सुदूरपश्चिम प्रदेशमे सन २०२३ के अगष्ट महिनासम ६ सय ३५ जाने डेंगु रोग संक्रमित पुगल स्वास्थ्य निर्देशनालय डोटीसे सार्वजनिक कैगिल रिपोर्टमे डेखल बा । जेम्ने कैलालीमे १९५, दार्चुलामे १९४, कञ्चनपुरमे ११५, अछाममे ५२, बाजुरामे ३२, डोटीमे १९, बझाङमे १२, डडेल्धुरामे १०, ओ बैतडीमे ६ जनहनमे डेंगुरोगके संक्रमण डेखल बा ।

सुदूरपश्चिम प्रदेशमे यिहीसे आघे सन २०२३ के मार्च अथवा (फागुन–चैत) महिनामे १२९ जनहनमे डेखल रहे । प्रदेशके दार्चुला जिल्लामे यहाँ ११७ जनहनमे डेंगु संक्रमण डेखल रहे । यी जिल्लामे पुुस महिनामे डेंगु डेखाई लाग रहे । जनवरी महिनामे ९ ओ फेब्रुअरीमे ३३ जनहनमे संक्रमण डेखल रहे । निर्देशनालय जनैले बा । यी प्रदेशमे जनवरीमे १५, फेब्रअरीमे ५२, मार्चमे १२९, अप्रेलमे २५, मे महिनामे २२, जुनमे २६, ओ जुलाईमे ५८ जनहनमे डेंगु रोग संक्रमण डेखल रहे ।

नेपालमे सन् २००४ मे पहिल चो चितवन जिल्लामे विदेशी नागरिकमे डेंगु रोग पाइल रहे । सन् २००६ मे पहिल चो नेपालमे डेंगु रोग प्रकोपके रुपमे देखा परल रहे । नेपालमे वि.सं. २०६१ सालसे डेंगु रोग विल्गैना सुरु पश्यात प्रत्येक वर्ष यी रोग कब महामारीके रुपमे टे कबु छिटफुट रुपमे डेखा पर्ना करल बा ।

२०२२ मे ५४ हजार ७८४ जनहनमे (२०७९ साल वैशाख महिनासे डेंगु रोगके विरामीके संख्यामे वृद्धि हुके भदौ कुवाँर कार्तिक हुइटी पुसमहिना सम देशभर झन्डै ५५ हजार से ढेर संक्रमण हुके ८८ जानेक मृत्यु हुइल बा । उ अवधीमे सुदुरपश्चिम प्रदेशमेफे डेंगु ढेर देखा परल रहे । कैलाली जिल्लामे ४३२ जनहनमे डेंगु रोग देखा परल रहे । ओ ३ जानेक मृत्युफे हुइल बा । कैलाली आर्थिक वर्ष २०७६–७७ मे ४१, २०७७–७८ मे १०१ ओ २०७८–७९ मे १९८ जनहनमे डेगु पुष्टि हुइल रहे ।

भाइरससे लग्ना डेंगु रोग रोकथामके एक ठो केल भरपर्दो उपाय डेंगु सर्ना मच्छरके लार्भा खोज ओ नष्ट अभियान रहल जनाइल बा । यकर साथे, घर वरपर पानी जमे नइडेनाके साथे बट्टा, गमला, टायर, प्लाष्टिकके डब्बा, ड्रमलगायतमे जमल पानी बेला–बेला फेक्ना आवश्यक रहल स्वास्थ्यकर्मी बटैले बटै ।

डेंगुसे बाँचेक लाग मच्छरके वृत्तिविकास रोक्न आवश्यक रहल जिल्ला स्वास्थ्य कार्यालयके निमित्त प्रमुख तेजविक्रम शाही बटैलै । उहाँ महामारी बहुआयामिक समस्या रहल आोरसे डेंगुके महामारी रोक्न सक्कु जाने अपन ठाउँसे लग्ना आवश्यक रहल बटैलै ।

डेंगु जुरी संक्रमित मच्छरके कटाईसे सर्ना एक मेरिक भाइरल सरुवा रोग हो । डेंगु बिषाणु भाइरससे संक्रमित हुइल एडीस एजिप्टाई ओ एडिस एल्बोपिकट्स मच्छरसे यी रोग सरठ । यी रोग लग्लेसे सुरुमे आकस्मिक रुघाखोकी जुरी आइठ । कबु कबु यी रोग लागल कुछ बिरामीमे रक्तश्रावके साथे प्लाज्मा लिकेज हुके, बिरामी जटिल अवस्थामे जाइ सेक्ठै ।