प्रतिष्ठानसे टमान विधाके १४ जाने सम्मानित

पहुरा समाचारदाता
धनगढी,१६ भदौ । डेउडा प्रतिष्ठान केन्द्रीय समितिसे सुदूरपश्चिम गौरा महोत्सव २०८० के अवसरमे दिवंगत अग्रज स्रष्टाके नाममे स्थापित ४ पुरस्कारसे १४ जाने स्रष्टाहे नगद पुरस्कारसहित सम्मान करल बा ।

प्रतिष्ठान महाशंकर देवकोटा बाङमय पुरस्कारसे महाकाब्यकार ज्योतिष कवि मनिराज जोशीहे, परिमल स्नेही समता पुरस्कारसे बिगुल बाजाके राष्ट्रिय प्रतिभा कालुसिंह दमाईहे, चल्ल्या साई श्रुति पुरस्कारसे डेउडा गायक पुरन सिंह कडायतहे ओृ हरिश्चन्द्र कडायत साधना पुरस्कारसे चर्चित लोक तथा डेउडा गायक दिपेन्द्र प्रसाद दाहालहे नगद ३ ÷३ हजार प्रमाणपत्र सहित दोसल्ला ओडाके सम्मान कैगिल संस्थाके वरिष्ठ उपाध्यक्ष एवं डेउडा प्रतिष्ठान प्रतिभा छनौट समितिके संयोजक सुरत रावत डोटेली कान्छा बटैलै ।

प्रतिष्ठानसे भाषाओर सम्मान रानाथारु भाषामे विद्याबारिधी करल धनगढीके डा. जीवन रानाहे, साहित्यओर सम्मान कञ्चनपुरके लोक साहित्य साधक अम्बादत्त जोशीहे, कलाओरके सम्मान कैलाली गाउँपालिकाके थारु गायक राज चौधरीहे, संगीतओरके सम्मान बैतडीके संगीतकार किशोर भण्डारीहे, नाट्य अभिनय निर्देशनओर सम्मान धनगढीके चलचित्रकर्मि राजकुमार जोशीहे, स्वास्थ्य सेवाओरके सम्मान जीवन नै स्वास्थ्य सेवामे समर्पित करल धनगढीके वरिष्ठ हाडजोर्नी तथानशा रोग विशेषज्ञ डाक्टर सुशील भण्डारीहे, संस्कृतिओरके सम्मान कञ्चनपुरके संस्कृतिकर्मी तर्कराज भट्टहे, समाजसेवाओरके सम्मान धनगढी निर्सग अस्पतालके अध्यक्ष तिर्थ पन्तहे सम्मान करल बा ।

ओस्टेक करके शैक्षिक क्षेत्रके सम्मान कैलाली बहुमुखी क्याम्पससे स्नातकमे टियु टपर धरणीधर भट्टहे प्रमाणपत्र सहित दोसल्ला ओडाई सम्मान प्रदान करल बा ।