कुलुवामे पुहके दुई जानेक मृत्यु

पहुरा समाचारदाता्
धनगढी, १६ भदौ । कञ्चनपुर जिल्लाके लालझाडी गाउँपालिका–५ देउवाटोल बैठना नारायण चन्दके छाई १० वर्षीया चन्दा चन्दके उहे ठाउँस्थित मछली कुलुवामे पुहके शनिच्चर सकारे मृत्यु हुइल बा ।

छेगरी चराई जाइबेर कुलुवा नघना क्रममे पुहाईबेर उहाँक मृत्यु हुइल हो ।

ओस्टेक करके बर्दिया जिल्ला मधुबन नगरपालिका–२ खाता बैठना २६ वर्षीया रविना चौधरीके उहे ठाउँस्थित औरही कुलुवामे पुहके शनिच्चर दुपहर मृत्यु हुइल बा । राजापुर नगरपालिका–१० दमरा कना ठाउँमे बहिनीयक घर जैना क्रममे उ कुलुवामे पुहल कना खबर प्राप्त हुइटीकी प्रहरी चौकी कोठियाघाटसे खटल प्रहरी उहाँ शव फेला पारल हो । दुनु घटनाके सम्बन्धमे प्रहरी आवश्यक अनुसन्धान करटी रहल बा ।