लागू औषध विरुद्वके महाअभियान
पहुरा समाचारदाता
धनगढी, १७ भदौ । लागू औषध दुरुपयोगके समस्या प्रतिदिन तिव्र रुपमे बह्रटी गैलपाछे सुदूरपश्चिम प्रदेश प्रहरी कार्यालयसे धनगढीके ऐश्वर्य विद्या निकेतन माध्यामिक विद्यालयमे लागू औषध नियन्त्रण सम्बन्धी जनचेतनामूलक प्रशिक्षण डेले बा ।
विशेष करके किशोर किशोरी प्रभावित हुई पुगल अवस्थामे यिहीहे न्यूनिकरण करे लाग लागू औषध विरुद्वके महाअभियान,२०८० संचालन करल सुदूरपश्चिम प्रदेश प्रहरी कार्यालय धनगढी, कैलालीके प्रहरी उपरीक्षक श्यामसिंह चौधरी बटैलै ।
कक्षा ११ ओ १२ मे अध्ययनरत छात्र, छात्रा करके जम्मा १६३ जानेक उपस्थिति रहल उ कार्यक्रममे प्रहरी उपरीक्षक चौधरी छात्र, छात्राहुकनहे लागू औषधके परिचय, सेवनकर्तामे विल्गैना लक्षण, समग्र रुपमे पर्ना वृहत असर ओ कानूनी प्रावधानके विषयमे जनचेतनामुलक प्रशिक्षण प्रदान करल रहिट ।
ओस्टेक करके उ प्रशिक्षणमे सहभागीसे लागूऔषध सम्बन्धी पुछल जिज्ञासाके सम्बोधन समेत करल रहिट । लागू औषध नियन्त्रण सम्बन्धी जनचेतनामूलक प्रशिक्षण कार्यक्रममे उ विद्यालयके प्राचार्य प्रेमनिधी ओझालगायतके सहभागिता रहे ।
