माओवादी रुपान्तरण हुइक लाग जनतामाझ आइल होः सचिव आचार्य
पहुरा समाचारदाता
धनगढी, १९ भदौ । नेकपा (माओवादी केन्द्र)के सचिव डिलाराम आचार्य माओवादीहुक्रे रुपान्तरण हुइक लाग तीन महिने अभियान संचालन करल बटैले बाटै । उहाँ जनतासे माओवादी नेता कार्यकर्तामे रुपान्तरणके आवश्यकता हुइल महशुस कैके अभियानमार्फत जनतामाझ फर्कल बटैलै ।
मंगरके धनगढीमे प्रेस सेन्टर नेपालसे आयोजना करल पत्रकारसँगके भेटघाट कार्यक्रममे बोल्टी आचार्य कहलै, “जनता बिग्रल नैहुइट । खुला राजनीतिमे आइलसँगे हम्रे नेता कार्यकर्तामे फोहोर मैला लागल बा । उ ढोइक लाग जनतामाझ पुगल हुइटी ।”
सचिव आचार्य अब्बे राजनीतिक उपलब्धी आपन पार्टीके नेतृत्वमे प्राप्त हुइल बटैटी ओकर पुष्टि पहिल संविधानसभामे पार्टीके पक्षमे व्यक्त हुइल जनतमसे पुष्टि करल बटैलै ।
माओवादीप्रतिके विश्वास गुम्ना अस्वीकार नैरहल बटैटी आचार्य कहलै, “माओवादी प्रतिके जनताके विश्वास गुम्नाके मुख्यकारण जनता हमार पार्टीहे अस्वीकार करल नैहुइट, हमार भिटट्रके टुटफुट ओ विभाजन हुइल हो । एकीकृत चार टुक्रामे विभाजित होके अइना परिणाम अस्टे रहठ् ।”
अपनेहुक्रे गम्भीर समिक्षा कैके फेनसे समाजवादी आन्दोलनके नेतृत्व कैना मेरके नेता कार्यकर्ता प्रतिवद्धता जाहेर कैके जनतामाझ आइल बटैलै ।
सचिव आचार्य ‘जनतासँग माओवादी, विशेष रुपमान्तण’ तीन महिने अभियानमे सुदूरपश्चि प्रदेशमे ७९ ठो अभियान टोली खटल जानकारी डेलै । सुदूरपश्चिमके ८ स्थानीय तह ओ ७३४ वडामे १५० नेता कार्यकर्ता खटल समेत जानकारी उहाँ डेलै ।
अभियान टोलीसे पहिल चरणके कार्यक्रम चल्टी रहल बटैटी सचिव आचार्य तीन महिनापाछे गाउँसमके पार्टी ओ जनताके आवस्थाके बिस्तृत प्रतिवेदन अइना ओ ओकर पाछे आर्थिक, सामाजिक, शैक्षिक, विकास निर्माणलगायतके जनताके जीवनसँग प्रत्यक्ष जोरल समस्याहे कैसिक समाधान कैना योजना पार्टीसे बनैना बटैलै ।
ढेर जटिला ओ कठिनाइके साथ पार्टीसे ढेर जनशक्ति दूरदराजके बस्तीमे केन्द्रीत करल बटैटी आचार्य पार्टी रुपान्तरण हुइना अभियानमे सक्कु सहयोग ओ समर्थन कैना फेन आग्रह करलै ।
एक औरे प्रसंगमे आचार्य सुदूरपश्चिम आर्थिक, सामाजिक, सांस्कृतिक, राजनीतिक, भाषिक, भौगोलिक तथा उब्जाउ जमिन ओ जातीय हिसाबमे पाछे नैपर्ना रलेसे फेन गरिबी, बिपन्नता, बेरोजगारीलगायतके क्षेत्रमे गम्भीर समस्या पैदा हुइल बटैटी उहीसे मुक्त कैना मेरके पार्टीसे संघ ओ प्रदेश सरकारसँग समन्वय कैके आघे बह्रना बटैलै ।
