गगरी फोर खेलमे पुरस्कर जिट्लैं लोकेन्द्र ओ सरोज

सागर कुस्मी
धनगढी, २१ भदौ । थारु समुदायके टिहुवार अस्टिम्कीके मौकामे गगरी फोर खेल उसरल बा । इ खेल थारु विद्यार्थी समाज कैलाली बहुमुखी क्याम्पस कमितिके आयोजनामे थारु छात्रबास धनगढीमे हुइल रहे ।

गगरी फोर खेलमे जम्मा २६ जाने भाग लेले रहिंट । जेम्नेसे स्ववियु सदस्य, थाविस केएमसी कमिटि अध्यक्ष लोकेन्द्र चौधरी ओ सरोज डंगौरा गगरी फोर्नामे सफल हुइल बटैं । उहाँ डुनु जाने नगद एक हजार पाँच रुपिया पुरस्कार जिट्ले बटैं । उ नगद पुरस्कर थाविसके केन्द्रीय उपाध्यक्ष ठाकुर करियाप्रधान ओ पत्रकार उन्नती चौधरी पुरस्कर सौंपलैं ।

थारु विद्यार्थी भैया बाबुनहे किताबी ज्ञानमे किल सिमित नैढारके बाहिरी ज्ञानफें सिखाइ परठ । खेलकुदमे रुचि जगैलेसे भैयाबाबुनके फें अपन जिनगीमे कुछ फरक प्रगती करेसेक्ठैं कना उद्देश्यसे इ गगरी फोर खेल संचालन करल बातचित घरके बरघर ठाकुरप्रसाद करियाप्रधान बटैलैं ।

कार्यक्रममे थाकस कैलालीके कार्यबाहक सभापति माधव चौधरी, बातचित घरके अनुगमन संयोजक इन्दु थारु, बातचित घरके अनधन संयोजक बसन्ती चौधरी सहभागी हुइल रहिंट । कार्यक्रमके ओरौनीमे मेरमेराइक थारु गीतबाँसमे नाँचगान फेन हुइल रहे ।

गगरी फोर खेल थाविस केएमसी कमितिके अध्यक्ष लोकेन्द्र चौधरीके अगुवाइमे हुइल खेल कार्यक्रम संचालन शिव कठरिया कैले रहिंट ।