राष्ट्रिय थारु कलाकार मञ्च सुदुरपश्चिम प्रदेशके पहिल अधिवेशन सम्पन्न
अध्यक्षमे फेरसे संगत थारु चयन
राजु चौधरी
धनगढी, २४ भदौ । राष्ट्रिय थारु कलाकार मञ्च सुदुरपश्चिम प्रदेशके पहिल अधिवेशन भब्यके साथ सम्पन्न हुइल बा ।
कञ्चनपुरके कृष्णापुरमे सम्पन्न अधिवेशनसे सर्वसहमतसे नयाँ कार्यसमिति चयन करले बा ।
समितिके अध्यक्षमे संगत थारु, उपाध्यक्षमे समु चौधरी, सचिवमे स्वरुप चौधरी, सह–सचिवमे शिसा चौधरी, कोषाध्यक्षमे राज चौधरी रहल बटै । ओस्टेक करके सदस्यमे सुयोग चौधरी, आशिष चौधरी, मनिराम चौधरी, नेहेल्जा चौधरी, सदिच्छा चौधरी, आदर्श महतो चयन हुइल बटै ।
ओस्टेक करके अधिवेशनके अवसरमे टमान क्षेत्रमे योगदान पुगाइल छ जनहनहे मञ्चसे सम्मान करले बा । सम्मानितमे थारु महानायक प्रेम चौधरी, गायिका समिक्षा चौधरी, गितकार सुबेश कठरिया, छायांकार साहिल चौधरी, मिडियाकर्मी अनिल कुस्मी, गायक नारायण राना रहल बटै ।
राष्ट्रिय थारु कलाकार मञ्च सुदुरपश्चिम प्रदेशके पहिल अधिवेशनके वडका पहुना प्रतिनिधिसभा सदस्य माननीय अरुण चौधरी ओ विशिष्ट पहुना कृष्णापुर नगरपालिकाके नगर उपप्रमुख द्रोपती रानालगायत कला ओ गायन क्षेत्रसे थारु समुदायके पहिचानसँगे कला, संस्कृति ओ भाषाके संरक्षण सम्बद्र्धनमे टेवा पुगाइल बटैलै । उहाँहुक्रे अधिवेशनके सफलताके शुभकामना व्यक्त करटी सर्वसहमतसे कार्यसमिति चयन कैनाफे आग्रह करले रहिट ।
मञ्चके प्रदेश अध्यक्ष संगत थारुके अध्यक्षतामे हुइल कार्यक्रमके सञ्चालन अनिल कुस्मी करले रहिट । कार्यक्रममे विशिष्ट पहुना राष्ट्रिय थारु कलाकार मञ्चके अध्यक्ष विनय बैध्य, टमान गायन तथा कला क्षेत्रके गायक तथा कलाकारहुकनके सहभागिता रहल रहल रहे ।
