कैलारीमे तिजके शुभकामना अदानप्रदान कार्यक्रम
पहुरा समाचारदाता
हसुलिया, २६ भदौ । कैलारी गाउँपालिका महिला तथा बालबालिका शाखाके आयोजनामे महिलाहुकनके लाग तिज पर्वके अवसरमे मंगरके रोज शुभकामना अदानप्रदान कार्यक्रम कैगिल बा ।
गाउँपालिका उपाध्यक्ष भगवतीकुमारी चौधरीके विशेष आथित्यमे तिज कार्यक्रम हुइल हो । कार्यक्रममे शुभकामना डेटी उहाँ बरसके एक दिन अइना तिजहे अपन गच्छय अनुुसार डिडीबाबुनहे मनैना आग्रह करल रहिट । कार्यक्रममे गाउँपालिकाके प्रमुख प्रशासकीय अधिकृत विरबहादुर ऐर, वडा नम्बर ४ के वडा अध्यक्ष ठागुराम चौधरी, वडा नम्बर ६ के वडा अध्यक्ष प्रेमबहादुर चौधरी, कार्यपालिका सदस्य टीका चौधरीभुल, गाउँपालिकाके पूर्व उपाध्यक्ष लक्ष्मी सत्गौवा, उर्मिला चौधरीलगायतसे तिजके शुभकामना व्यक्त करल रहिट ।
ओस्टेक तिजके अवसरमे हुइल कुुुर्सी दौड खेलमे गाउँपालिका उपाध्यक्ष भगवतीकुमारी चौधरी पहिल, कर्मचारी अनुषा चौधरी दुसरा हुइल रही कलेसे टिसरामे कर्मचारी आयस खाती हुइल रहिट । कुर्सी दौड खेलमे महिला जनप्रतिनिधि ओ महिला कर्मचारी भाग लेहल रहिट । ओस्टेक जनप्रतिनिधि ओ कर्मचारी विच हुइल फुलङगा फुटैना खेलमे कर्मचारी पहिल हुइल रहिट ।
तिजके शुभकामना अदानप्रदान कार्यक्रममे जनप्रतिधि ओ कर्मचारीहुकनके सहभागिता रहल रहे । कार्यक्रमके संचालन कैलारी गाउँपालिका महिला तथा बालबालिका शाखा प्रमुख बालकुमारी चौधरी करल रहिट ।
