‘बालबालिकाके शिक्षामे लगैना लगानी खेर नइजाई’

पहुरा समाचारदाता
हसुलिया, २९ भदौ । बालबालिकाहुकनमे लगानी, सुनिश्चित भविष्यके थालनी’ कना मुल नाराके साथ कैलारीमे ५९औ राष्ट्रिय बाल दिवस मनागिल बा ।

कैलारी गाउँपालिकाके उपाध्यक्ष भगवतीकुमारी चौधरीके अध्यक्षतामे हुइल कार्यक्रममे वडका पहुना कैलारी गाउँपालिका अध्यक्ष राजसझ चौधरी वडका पहुना रहल रहिट । बाल दिवसके उदघाटन कार्यक्रममे गाउँपालिक अध्यक्ष राजसमझ चौधरी बालिकामे लगानी करलेसे भविष्यमे प्रतिफल डेख्ना बटैलै । उहाँ कहलै, शिक्षामे लगैना लगानी विस्तारे विल्गना बटैलै ।

कार्यक्रममे सामाजिक विकास समिति संयोजक तथा वडा नम्बर ३ के वडा अध्यक्ष सन्तराम चौधरी सामुदायिक विद्यालयमे पह्रना विद्यार्थीफे अब्बल रहल बटैलै । उहाँ कहलै, मै फे सामुदायिक विद्यालयमे अध्ययन करनु मने सरकारी जागिर खैनु । सामुदायिक विद्यालयमे पह्रना विद्यार्थीफे मजा प्रगति करल बटैलै ।

कैलारी गाउँपालिकाके शिक्षा शाखा प्रमुख गणेश प्रसाद मिश्र बाल दिवस कार्यक्रमसे बालबलिका प्रतिभा प्रस्फुटन कैना सहयोग मिलल बटैलै ।

कार्यक्रममे अध्यक्ष तथा गाउँपालिका उपाध्यक्ष भगवतीकुमारी चौधरी बालबालिकाहुकनहे बाहिय ज्ञान प्रदान करलेक लाग अतिरिक्त क्रियाकलापके संग्गे बालदिवस मनैना अतिआवश्यक रहल बटैली । दिपेन्द्र माविमे हुइल ५९औ राष्ट्रिय बाल दिवस कार्यक्रममे मावि स्तरिय वक्तृत्वकला प्रतियोगिता, बाल विवाह विरुद्धके सडक नाटक तथा स्काउट कैगिल बा ।

कैलारी गाउँपालिका महिला तथा बालबालिका शाखाके आयोजनामे हुइल कार्यक्रम हुइल रहे । कार्यक्रममे बाल दिवस मनाइक लाग सहकार्य करटी बालकल्याण संघ टीकापुर ३० हजार, सप्रोस नेपाल १० हजार, सामाजिक सेवा अध्ययन केन्द्र ५ हजार, पारदर्शि महिला विकास बहुउद्देश्यीय सहकारी संस्था लिमिटेड ५ हजार सहिट तीन ठो व्याग ओ शान्ति पुनस्र्थापना गृह ५ हजार नगद सहयोग करल रहे ।

५९औ राष्ट्रिय बाल दिवस कार्यक्रम संचालन कैलारी गाउँपालिका महिला तथा बालबालिका शाखा प्रमुख बालकुमारी चौधरी ओ स्वागत मन्तव्य सप्रोस नेपालके सरिता चौधरी करल रहिट । कार्यक्रममे वडा नम्बर १ वडा अध्यक्ष धोजहरिपाल बोहरा, वडा नम्बर ४ वडा अध्यक्ष ठागुराम चौधरी, वडा नम्बर ६ के वडा अध्यक्ष प्रेमबहादुर चौधरी, वडा नम्बर ७ के कार्यवाहक अध्यक्ष सुन्दरी चौधरी, वडा नम्बर ८ वडा अध्यक्ष तारामल कठरिया,सामाजिक विकास शाखा प्रमुख यगम कलेल, दिपेन्द्र माविके प्रधानाध्यापक विनोद भट्टराई लगायत टमान विद्यालयके शिक्षक प्रतिनिधि, टमान विद्यालयके विद्यार्थी, संघ संस्थाके प्रतिनिधिहुकनके सहभागिता रहल रहे ।

ओस्टेक करके ५९औ राष्ट्रिय बाल दिवसमे टमान प्रतियोगिता क्रियाकलापमे भाग लेहुइया बालबालिकाहुकनहे गाउँपालिका उपाध्यक्ष भगवतीकुमारी चौधरी पुरस्कार तथा प्रमाणपत्र वितरण करल रहिट ।