टीकापुर घटनाके चार राजबन्दी रिहा
पहुरा समाचारदाता
धनगढी, ३ कुवाँर । संविधान जारी करल दिनहे अवसर पारके चार जाने टीकापुर राजबन्दीहुकनके रिहा हुइल बा ।
कैलाली कारागारमे रहल प्रदीपकुमार चौधरी, वीरबहादुर चौधरी, हरिनारायण चौधरी ओ पोखरा सुधार गृहमे रहल टीकापुर राजबन्दी श्रवण चौधरी बुधके रोज कारागारमुक्त हुइल बटैं ।
टीकापुर घटनाके राजबन्दी रिहाईं हुइलपाछे थारु कल्याणकारिणी सभा, कैलालीके कार्यवाहक सभापति माधव चौधरी ओ थरुहट थारुवान राष्ट्रिय मोर्चा कैलालीके प्रवक्ता चुनीराम चौधरी संयूक्त विज्ञप्ती जारी करटी नेपाल सरकारके सकारात्मक कार्यप्रति हार्दिक धन्यवाद अभार प्रकट करले बटै । सरकारके यी निर्णय अत्यन्त सकारात्मक ओ सान्दर्भिक रहल कहटी यिहे सन्दर्भमे टीकापुर मुद्दा लागल सक्कु राजबन्दीके मुद्दाहे राजनीतिक रुपमे समाधान करके दीर्घकालीन सद्भावके वातावरण निर्माण कैना सरकारसंग अपील करले बटै ।
२०७२ कुवाँर ०३ गते जारी हुइल नेपालके संविधानमे पहिचान ओ अधिकारसंग सम्बन्धित थरुहट थारुवान आन्दोलनसे उठान करल मुद्दा अभिनफे ओझेलमे परल विज्ञप्तीमे कहल बा ।
टीकापुर मुद्दा राजनीतिक रुपमे समाधान करे पर्ना, लाल आयोगके प्रतिवेदन सार्वजनिक करे पर्ना, पहिचानसहितके थरुहट थारुवान प्रदेशके सही सीमांकन करेपर्ना, राज्यके हरेक निकायमे न्यायीक समानुपातिक प्रतिनिधित्व हुईपर्ना, आमजानताके आत्म सम्मान, पहिचान तथा स्वाभिमानहे उठान कैना जातीय, वर्गीय, क्षेत्रीय, लिङगीय विभेदहे सदाके लाग अन्त्य करे पर्ना लगायतके मुद्दा संविधानमे सहि ढङसे सम्बोधन हुई नइसेकल ओरसे यी संविधान अधुरो अपुरो रहल कहल बा ।
विज्ञप्तीमे कहल बा, ‘यी संविधानहे संसोधन करके सक्कुहुनके अपनत्व हुइना खालके साझा संविधान बनैना सरकार, संसद ओ आमजनताके साझा दायित्व हो ।’, यिहीहे मध्यनजर करके राज्यसे जनताके माग, मुद्दाहे सुनिश्चित कैना पाछे परे नइपरल ।’
सरकारसे पहिचान ओ अधिकारके मुद्दाहे निरन्तर वेवास्ता करटी रहल ओरसे कुवाँर ३ गतेके दिनहे ‘कुवाँर तीन करिया दिन’ कहिके संविधान जारी हुइल दिनसे सरकारहे दवाव डेना विविध विरोधके कार्यक्रम करटी आइल विज्ञप्तीमे कहल बा । थारु कल्याणकारिणी सभा ओ थरुहट थारुवान राष्ट्रिय मोर्चासे ‘कुुवाँर तीन करिया दिन’के रुपमे शान्तिपूर्ण ढङगासे बुधके साँझ ७ बजेसे आधा घण्टाके ला िब्ल्याक आउट करके विरोध कार्यक्रममे मनाइल माधव चौधरी बटैलै ।
राष्ट्रपतिद्धारा ६७० कैदीके सजाय माफी मिनाहा
संविधान दिवसके अवसरमे राष्ट्रपति रामचन्द्र पौडेल ६ सय ७० जाने कैदीके सजाय माफी मिनाहा करले बटै । तीन ज्येष्ठ नागरिकसहित ६७० जानेक सजाय माफी मिनाहा करल राष्ट्रपतिके कार्यालयसे मंगरके एक विज्ञप्ति जारी करटी जनैले बा ।
यी आघे मन्त्रिपरिषद्के भदौ २९ गतेके बैठकसे ओइनके सजाय मिनाहाके लाग राष्ट्रपतिहे सिफारिस करल रहे । सरकारके सिफारिस कार्यान्वयन करटी राष्ट्रपतिसे माफी मिनाहा डेहल हुइट ।
