‘महिलन आर्थिक शसक्तीकरणमे जोड’

पहुरा समाचारदाता
धनगढी, ४ कुवाँर । महिलाहुकनहे हरेक क्षेत्रमे आघे बह्राइक लाग आर्थिक शसक्तीकरणमे बल्गर बनाईपर्नामे जोड डेगिल बा ।

‘दिगो विकासके लक्ष्यः शान्तिके मूलभूत आधार’ कना मुल नाराके साथ मानव अधिकारका लागि महिला एकल महिला समुह सुदूरपश्चिम प्रदेशके आयोजना तथा कुर्वे विष्ट्रोके आर्थिक सहयोगमे विफेक रोज धनगढीमे हुइल अन्तर्राष्ट्रिय शान्ति दिवसके अवसरमे हुइल अन्तरक्रिया कार्यक्रमके सहभागिहुक्रे ओसिन कहल रहिट ।

धनगढी उपमहानगरपालिका कार्यपालिका सदस्य माया भण्डारी महिलाहुकनहे अभिनफे समाज हेर्ना दृष्टिकोण फरक रहल कहटी हरेक क्षेत्रमे आघे बह्राइक लाग आर्थिक शसक्तीकरणमे बल्गर बनाई पर्नामे बटैली । उहाँ कहली, ‘महिलाभिटरफे एकल महिलाहे झन समाजमे हेर्ना नजरिया फरक बा । कोई महिला घरसे बाहेर निक्रेबेर घर, समाज बाट कटठै । ढेर समय बाहेर बैठलेसे कुहीहे बोल्लेसे शंकाके नजरसे हेर्ना करजाइठ ।’

उहाँ कहली, ‘द्वन्दप्रभावित÷एकल महिलाहे समाजहे परिवर्तन कैनामे भारी योगदान बा । ओइनके मनमे बहुट पीडा बा । मने उ पीडा नुकाके समाजमे व्यावसायिक रुपमे अब्बल हुइटी गैल बटै ।’ अब्बेक अवस्थामे अधिकार कोई डेहे नइअइना ओरसे सक्षम बनेक लाग अपनही अग्रसर हुइना उहाँ आग्रह करली ।

धनगढी उपमहानगरपालिका महिला तथा बालबालिका शाखा प्रमुख अनिता बुढाऐर धनगढी उपमहानगरपालिकासे महिलाहुकनके सक्षम बनाइक लाग टमान मेरिक सीपमुलक आयमुलक तालिमके आयोजना करल बटैली । उहाँ कहली,‘ महिलाहुक्रे आर्थिक रुपमे सक्षम बन्लेसे कुछफे काम करे सेक्ही । नगरपालिकासे टमान मेरिक सीपमुलक तालिमके प्रदान कैसेकल ओरसे सीपके सदुपयोग करके आर्थिक रुपमे सवल बने सेक्जाई । महिलाहुक्रे पाइल अवसर कबुफे नइगुमैना उहाँ आग्रह करली ।

मानव अधिकारका लागि महिला एकल महिला समुह सुदूरपश्चिम प्रदेशके उपाध्यक्ष धना पाठक ग्रामीण क्षेत्रके द्वन्दप्रभावित÷एकल महिला अपन अधिकारके लाग अभिनफे बोले नइसेक्ना ओरसे सरोकारवाला निकाय सीप मुलक आयमुलक ओ क्षमता अभिवृद्धिके लाग कार्यक्रम संचालन कैनामे जोड रहिट ।

कार्यक्रममे मानव अधिकारका लागि महिला एकल महिला समुह अन्र्तगत कुर्वे विष्ट्रोके आर्थिक सहयोगमे संचालित शान्ति परियोजनाके संयोजक वेद अवस्थी संयुक्त राष्ट्रसंघके महासभाससे न् १९८१ मे हरेक वर्ष सेप्टेम्बर २१ के दिनहे विश्व शान्ति दिवसके रूपमे मनैना निर्णय करल ओ नेपालमे २०६५ सालसे शान्ति दिवस टमान कार्यक्रमके मनैटी आइल जानकारी डेली ।

हरेक वर्ष संयुक्त राष्ट्रसंघके सदस्य राष्ट्रसे यी दिवस मनैटी आइलमे नेपालमेफे टमान कार्यक्रम करके विगतके बरससे मनाइल उहाँ जनैली । गैल बरसमे दिप प्रज्वलन, रक्तदान, वृक्षरोपण, अस्पतालके विमारीहुकनहे फलफुल वितरके करके मनाइल बटैली ।

मानव अधिकारका लागि महिला एकल महिला समुह सुदूरपश्चिम प्रदेश अध्यक्ष सुमन शर्माके अध्यक्षतामे हुइल कार्यक्रममे स्वागत मन्तव्य कोषाध्यक्ष मीना भण्डारी करल रहिट । कार्यक्रममे धनगढी उपमहानगरपालिका, गोदावरी नगरपालिका ओ कैलारी गाउँपालिकाके द्वन्दप्रभावित÷एकल महिलाहुकनके सहभागिता रहल रहे ।

ओस्टेक करके अन्तर्राष्ट्रिय शान्ति दिवस देशभर मनागिल बा । शान्ति कायम कैना व्यक्तिगत ओ सामूहिक उत्तरदायित्व रहल उल्लेख करटी संयुक्त राष्ट्र संघसे शान्ति प्रवद्र्धनसंगसे दिगो विकास लक्ष्य प्राप्त कैना मद्दत पुग्न जनाइल बा ।

संयुक्त राष्ट्रसंघीय मानव अधिकारसम्बन्धी घोषणा जारी हुइलफे ७५ वर्ष पुगल बा । अब्बे अन्तर्राष्ट्रिय कानूनके अभिन्न अंङगके रूपमेफे शान्तिके अधिकार स्थापित हुइल बा । सेप्टेम्बर २१ हे विश्व समुदायसे ‘अल्जाइमर्स डे’ के रूपमेफे मनैटी आइल बा ।