स्थानीय सरकारसे बहुउद्देश्यीय विकास समाजके कार्यक्रमके अनुगमन
पहुरा समाचारदाता
धनगढी, ५ कुवाँर । बहुउद्देश्यीय विकास समाज डडेल्धुरासे भजनी नगरपालिकामे संचालित बाढ पहिरोके उच्च जोखिमके पूर्व तयारी तथा प्रतिकार्य परियोजना अन्तर्गत भजनी नगरपालिकामे संचालन करल टमान कृयाकलाप ओ गतिविधिके स्थानीय सरकारके ओर अनुगमन कैगिल बा ।
यी क्रममे बाढ तथा डुबान प्रभावित क्षेत्रमे स्थानीय श्रोत साधनके प्रयोग मार्फत विपद जोखिम न्यूनीकरणमे स्थानीय समुदायके सहभागिता, विपद जोखिम न्यूनीकरणमे समुदायके प्रयास, ह्इल करल अभ्यास तथा योजनाके अवलोकन कैनाके साथे छलफल समेत करल रहिट ।
अनुगमन टोलीके प्रमुख एंव भजनी नगरपालिकाके नगर प्रमुख केवल चौधरी स्थानीयस्तरमे विपद जोखिम न्यूनीकरण ओ समुदायमे सचेतना अभिवृद्धि कैना काममे संस्थासे महत्वपूर्ण भूमिका खेलल कहटी धन्यवाद ज्ञापन करल रहिट । उहाँ बाढ, डुबान लगायतके विपदसे समुदायहे जोगैना सचेतीकरण प्रभावकारी हुइना ओरसे ओकर लाग पालिकाके ओरसे अपने संस्था संग समन्वय ओ सहकार्य कैना सदा तत्पर रहल बटैलै ।
अनुगमनके क्रममे परियोजना संयोजक शिवराज पाठक भजनी नगरपालिकामे संचालन हुइल गतिविधिके बारेमे जानकारी करैलै । अनुगमन टोलीमे उप प्रमुख राजु तिरुवा, वडा अध्यक्ष विक्रम चौधरी, पंकज चौधरी, केशव बुढा,धर्मेन्द्र श्रेष्ठ, भजनी नगरपालिका निमित्त प्रमुख प्रशासकीय अधिकृत चन्द्रदेव भट्ट, भजनी प्रहरी प्रमुख लोकराज जोशी लगायतके,नेपाल रेडक्रस सोसाइटी भजनी सभापति रामनारायण चौधरी, भल्मन्सा विपद टास्क फोर्सके प्रतिनिधि, परियोजना संयोजक शिवराज पाठक, डिआरआर अधिकृत राजेन्द्र रैका, सामाजिक परिचालक बिष्णु जैसी, शर्मिला चौधरी लगायतके सहभागीता रहल रहे ।
