सीमान्तकृत समुदायके संविधान प्रदत्त अधिकार सुनिश्चित हुइपरलः पूर्व सांसद श्रीपाईली

पहुरा समाचारदाता
धनगढी, ७ कुँवार । संविधानसभा सदस्य एंव दलित, हलिया, कमैया मुक्ति आन्दोलनके राष्ट्रिय अगुवा हरि श्रीपाईली सरकार मुक्त कमैया, हलिया ओ दलितके सवालमे गम्भीर हुइपरना बटैले बटैं ।

संविधान दिवसके अवसरमे मुक्त कमैया विकास मञ्च धनगढीसे कैलारी गाउँपालिका वडा नं ५ मुक्त कमैया शिवर शान्तिटोलमे आयोजना करल संविधान दिवस ओ दलित मुक्त कमैया, हलिया कमलरीके सवाल विषयक् अन्तरक्रिया कार्यक्रममे पूर्व सांसद श्रीपाईली ओहे जोड गेले रहैं ।

उहाँ राज्य गम्भीर नैहोके संविधान प्रदत्त अधिकार समेत सीमान्तकृत समुदाय प्राप्त करे नैसेकल बटैटि ठोस नीति तथा कार्यक्रमके साथ सीमान्तकृत समुदायके हकअधिकार स्थापित ओ सम्मानजनक न्यायिक पुनःस्थापना करेपरना बटैलैं ।
कार्यक्रममे मुक्त कमैया अगुवा कौशिला चौधरी, अधिकारकर्मी ईन्द्र चौधरीलगायत मन्तव्य व्यक्त करले रहैं ।