कैलारी–४ मे स्तनपान कक्षके उदघाटन

पहुरा समाचारदाता
हसुलिया, ७ कुवाँर । कैलाली जिल्लाके कैलारी गाउँपालिका वडा नम्बर ४ मे स्तपान कक्षके उदघाटन हुइल बा ।

गाउँपालिका उपाध्यक्ष भगवतीकुमारी चौंधरी एक कार्यक्रम विच उ स्तनपान कक्षके उदघाटन करल रहिट । गाउँपालिकासे हरेक वडा कार्यालयमे स्तनपान कक्ष स्थापना कैना उहाँ बटैली ।

पालिका अन्र्तगतके सरकारी कार्यालयमे स्तनपान कक्ष संचालन कैना जरुरी बा मने ठाउँक अभाव डेखल बा,’ उहाँ कहली, ‘सक्कु सरकारी कार्यालय, स्वास्थ्यमे विस्तारे ठाउँक व्यवस्थापन करटी स्तनपान कक्ष संचालन करजाई । हाल कैलारीके २ ठो वडा कार्यालयमे स्तनपान कक्ष संचालनमे आइल बा ।’ डाई मनै अपन लर्कन मजासे दुध चुसैसे बच्चा निरोगी रना ओ लर्कनमेफे रोगसे लरे सेक्ना क्षमता बह्रना ओरसे पालिकाके सरकारी कार्यालयमेफे स्तनपान कक्ष संचालनमे नन्ना उहाँ जनैली ।

कार्यक्रममे प्रमुख प्रशासकीय अधिकृत विरबहादुर ऐर स्तनपन कक्ष संचालनमे आइलपाछे लर्का लेके सेवा लेहे आइल सेवाग्राहीमे सेवा लेनामे सहजुल हुइल बटैलै । महिला तथा बालिका शाखा प्रमुख बालकुमारी चौधरी स्तनपान कक्षहे प्रारम्भिक बालविकास सिकाई केन्द्रके रुपमे लेहे सेक्ना बटैली । उहाँ कहली, स्तनपान कक्षमे बालबालिकाके लाग टमान मेरिक खेलौनाके व्यवस्था कैगिल रहठ । दुध पिना लर्का मजासे दुध पिए पैना ओ स्तनपान कक्षमे रहल खेलौना खेलाके मनोरञ्जन लेहे सेक्ना उहाँ जनैली ।

वडा नम्बर ४ आधारभूत स्वास्थ्य संस्थाके प्रमुख रमेशबहादुर रोकाय संविधानके बालबालिकाके हक सुनिश्चित करटी मजासे दुध पिए पैना ओ पिवाई पैना कहल बटैलै । उहाँ कहलै, हरेक कार्यालयमे स्तनपान कक्ष संचालन नाने पर्ना कहल बा मने सक्कु संचालनमे आइनइसेक्ना दुखद बाट रहल बटै ।

महिला स्वास्य स्वयं सेविका पवित्रा सेढाई स्तनपान कक्षहे सेवा सुविधा बनाई पर्ना बटैली । पेटमे बच्चा रहल थेनसे ओइनहे जानकारी, बच्चा हुइलपाछे कैसिक दुध खवैना, कटरा समयसम खवाई पर्ना ओ पोषिलो खानाके बारेमे जानकारी डेना आवश्यक रहल उहाँ बटैली ।

कार्यक्रममे भल्मन्सा तिर्थ प्रसाद नेपाल, कार्यपालिका सदस्य लालबहादुर विक, आमा समुहके सरस्वती चौधरी लगायत मन्तव्य व्यक्त करल रहिट ।

कैलारी गाउँपालिका वडा नम्बर ४ के वडा अध्यक्ष ठागुराम चौधरीके घरगोस्यम हुइल कार्यक्रममे उहाँ वडा भिटरके सक्कु लरकोर्य महिलन सेवा लेना सहजुल हुइना बटैलै । कार्यक्रममे कैलारी गाउँपालिकाके सामाजिक विकास शाखा प्रमुख यगम कलेल, वडा सदस्य मोहनलाल चौधरी, लक्ष्मी चौधरी, वडा सचिव श्री प्रसाद चौधरी, महिला स्वास्थ्य स्वय सेविका, टमान टोलके भल्मन्सा, आमा समुहके सदस्य, संघ संस्थाके प्रतिनिधिहुकनके सहभागिता रहे ।

कार्यक्रम संचालन सेतो गुराँस राष्ट्रिय बालविकास केन्द्र कैलारी गाउँपालिका बाल विकास संयोजक सुरज परियार करल रहिट । ओ स्वागत मन्तव्य वडा सदस्य हरिद्वारी चौधरी करल रहिट ।