धनगढीसे १९० जाने जेष्ठ नागरिकहे पठाइल मुक्तिनाथ तीर्थयात्रामे

पहुरा समाचारदाता
धनगढी, ७ कुवाँर । जीवनभर घरधन्दामे सिमित जेष्ठ नागरिकहे धनगढी उपमहानगरपालिकासे तीर्थयात्रामे पठैले बा । अँटवारके रोज धनगढी उपमहानगरपालिकासे नगरके एक सय ९० जाने ज्येष्ठ नागरिकहे मुक्तिनाथ पठाइल हो । नगर प्रमुख गोपाल हमाललगायत जनप्रतिनिधिसे टीका ओ खादा लगाके जेष्ठ नागरिकहे तीर्थयात्राके लाग कार्यालय प्रांगणसे बिदाइ करल हुइट ।

ओइने एक साताके लाग मुक्तिनाथ यात्रामे निकरल हुइट । ज्येष्ठ नागरिकहे नयाँ पुस्तासे सम्मान करे परठ कना भावनाके विकास करेक लाग ओइनहे तीर्थयात्रामे पठाइल नगर प्रमुख हमाल बटैलै । ‘स्थानीय तहसे ज्येष्ठ नागरिकहे करल यी मेरिक सम्मान हो,’ मेयर हमाल कहलै, ‘उहाँहुकनहेफे अपन जीवनके उत्तरार्द्धमे स्थानीय सरकारसे हेरल कना हुइठ ।

यिहीसे धार्मिक पर्यटन प्रवर्द्धनमेफे टेपा पुगी ।’ नगरप्रमुख हमाल कहलै उपमहानगरसे अपन वार्षिक नीति तथा कार्यक्रममे ‘ज्येष्ठ नागरिकहे तीर्थयात्रा’ कार्यक्रम समावेश करल रहे । अइना वर्षमेफे यी कार्यक्रमहे निरन्तरता डेना उहाँ बटैलै । उपमहानगरसे पाँच डो बस भाडामे लेके वृद्धवृद्धानहे धार्मिक यात्रामे पठाइल हो ।

प्रत्येक बसमे एक÷एक जाने स्वास्थ्यकर्मीके समेत व्यवस्था करल बा । उपमहानगरसे तीर्थयात्रामे गैल नागरिकहे मुक्तिनाथसहित कागवेनी, पोखरा, देवघाट ओ नवलपरासीके कैवल्यधामके भ्रमण करैना नगर प्रमुख हमाल बटैलै । उहाँ वृद्धवृद्धहुकनके सम्मानमे उपमहानगरसे हरेक वर्ष मुक्तिनाथ दर्शन करैना बटैलै ।

तीर्थयात्री सक्कुहुनहे खादा, टीका ओ टेक्न लौरोसमेत प्रदान करल बा । यी आघेफे धनगढी उपमहानगरपालिकासे एक सय २२ जेष्ठ नागरिकहे मुक्तिनाथ यात्रामे पठाइल रहे ।