प्रिन्सेस कपके मुख्य प्रायोजनमे ग्रेस इन्टरनेसनल
पहुरा समाचारदाता
धनगढी, ८ कुँवार । धनगढी क्रिकेट एकेडेमीसे आयोजना कैना प्रिन्सेस कप स्कुल महिला क्रिकेट प्रतियोगितामे ग्रेस इन्टरनेसनल मुख्य प्रायोजन कैके सहयोग करले बा ।
काठमाडौंमे सोम्मारके ग्रेस इन्टरनेसनलके निर्देशक तथा सह सम्पादक अन्ड्रु पौडेल ओ एकेडेमीके व्यवस्थापक समुयल न्यौपान मुख्य प्रायोजन सम्झौतामे हस्तान्तरण करल रहिट ।
आगामी डिसेम्बर ८ से धनगढीमे हुइना प्रतियोगिताके मुख्य प्रायोजन गरेपश्चात पौडेलसे ग्रासरुट क्रिकेटके विकासमे सहयोग करे पाइबर खुशी व्यक्त करलै । ओस्टके उहाँ नेपालमे क्रिकेट क्रेज एकदमे मजा रहल कहटी इ प्रायोजनहे ग्रेस इन्टरनेसनलसे नेपाली क्रिकेटके विकासमे करल लगानीके रुपमे लेडेना अनुरोध करलै ।
ओस्टके एकेडेमीके व्यवस्थापक न्यौपाने प्रिसेन्स कप महिला क्रिकेटके ग्रासरुट विकासमे महत्वपूर्ण रहल बटैटी प्रायोजनके लाग पौडेलहे धन्यवाद व्यक्त करलै ।
धनगढीमे हुइना प्रतियोगितामे १६ स्कुलके सहभागिता रहना बा । विजेता ३० हजार तथा उपविजेता १५ हजार पैना बाटै । ओस्टके प्लेयर अफ द सिरिजसे २ हजार ओ बेस्ट ब्याटर १ हजार नगद हात पर्ना आयोजक जनैले बा ।
डीसीएसे सक्कु महिला खेलाडीहे निःशुल्क प्रशिक्षणके व्यवस्था मिलैले बा । डीसीएमे आधा दर्जनसे ढेर अन्तर्राष्ट्रिय खेलाडी प्रशिक्षणरत् रहल बाटै । हाल नेपाली टोलीके इश्वरी विष्ट तथा रुवि पोदार डिसिएमे अभ्यासरत् रहल बाटै ।
