सुदूरपश्चिमके मुख्यन्यायाधिवक्तामे जोशी नियुक्त

पहुरा समाचारदाता
धनगढी, ९ जेठ । सुदूरपश्चिम प्रदेशके मुख्य न्यायाधिवक्तामे ठेकेन्द्रराज जोशी नियुक्त हुइल बाटै । मुख्यमन्त्री कमलबहादुर शाहके सिफारिसमे मंगरके प्रदेश प्रमुख देवराज जोशी उहाँहे मुख्य न्यायाधिवक्तामे नियुक्त करल हुइट ।

नेपालके संविधानके १६० के उपधारा २ बमोजिम जोशीहे मुख्य न्यायाधिवक्तामे नियुक्त करल प्रदेश प्रमुखके कार्यालय जनैले बा । धनगढी उपमहानगरपालिका–२ के अधिवक्ता जोशी २०५८ सालसे कैलाली जिल्ला अदालत बार एसोसिएशनमे आवरुद्ध होके कानून व्यवसायीके रूपमा काम कैटी आइल बाटै ।

उच्च अदालतके न्यायाधीश सरह मर्यादा ओ सुविधा पैना मुख्य न्यायाधिवक्ता प्रदेश सरकारके काननी सल्लाहकार हो । नेपालके संविधान २०७२ के धारा १६० से महान्यायाधिवक्ताके मातहत रहना मेरके प्रत्येक प्रदेशमे एक मुख्यन्यायाधिवक्ता रहना व्यवस्था करल बा ।

मुख्य न्यायाधिवक्ताके नियुक्ति मुख्य मन्त्रीके सिफारिसमे प्रदेश प्रमुखसे हुइना व्यवस्था रहल बा । संविधानके धारा १६०(५) मे मुख्य न्यायाधिवक्ता प्रदेश सरकारके मुख्य कानूनी सल्लाहकार हुइना ओ संवैधानिक एंव कानूनी विषयमे प्रदेश सरकार वा प्रदेश सरकारसे टोकल अधिकारीहे राय सल्लाह डेना मुख्य न्यायाधिवक्ताके कर्तव्य रहना संवैधानिक व्यवस्था रहल बा ।