केजिष्ट मनाइल विश्व पर्यटन दिवस
पहुरा समाचारदाता
धनगढी, १० कुवाँर । धनगढी रातोपुलमे रहल केजिष्ट होटेल म्यानेजमेन्ट इन्सिच्युटसे विश्व पर्यटन दिवस मनैले बा । केजिष्टसे बुधके वकृत्वकला कार्यक्रमके आयोजना करटी विश्व पर्यटन दिवस मनाइल हो ।
नेपाल पर्यटन सम्भाव्यताके भूमी शिर्षकमे आयोजित प्रतियोगितामे प्रज्वल रावल पहिल हुइल बटै । १५ जाने सहभागी आन्तरिक प्रतिस्पर्धामे दीपक विक द्ुसरा ओ कविराज बोहरा टिसरा हुइल बटै । सहभागी तीनु जाने टोकन अफ लव प्राप्त करलै ।
विद्यार्थीहुकनके सक्रिय सहभागिता उत्साहजनक रहल केजिष्टके एकेडेमिक हेड सन्दीप पाण्डे जानकारी डेलै । विगत १२ वर्षसे हस्पिटालिटी क्षेत्रसंग सम्बन्धी विविध दिवस केजिष्टसे मनैटी आइल बा । उ परम्पराहे निरन्तरता डेटी यी वर्षफे पर्यटन दिवस मनाइल एकेडेमिक हेड पाण्डेय बटैलै । यी खाले अतिरिक्त क्रियाकलापसे विद्यार्थीके व्यक्तित्व तथा नेतृत्व विकासमे सहयोग पुगल उहाँ बटैलै ।
कार्यक्रममे प्रमुख अतिथि एसपीए कलेजके बीएचएम कार्यक्रम निर्देशक डिल्लीराज भण्डारी, केजिष्टके व्यवस्थापक गोपालबहादुर धामी, संयोजक सम्राट बुढामगर, सेफ राजन खड्का, मार्केटिङ प्रमुख भक्तबहादुर जोरा, लेखापाल धिराज बोगटीलगायतके उपस्थिति रहे ।
२०६८ सालसे होटेल म्यानेजमेन्ट ओ डिप्लोमा कोर्ष मार्फत दक्ष जनशक्ति उत्पादन करटी आइल केजिष्ट सुदूरपश्चिममे हस्पिटालिटी क्षेत्रमे अग्रिणी संस्था हो । केजिष्टमे अध्ययनरत् विद्यार्थी हालसम मलेसिया, दुबईं, जोर्डन, कुवेत, भारत ओ नेपालके स्टार होटलमे रोजगारीमे कार्यरत बटै । केजिष्टमे मलेसियन इटीभीए ओ नेपालके सिटीईभिटीके २ वर्षे होटेल म्यानेजमेन्ट तथा डिप्लोमा कोर्ष सञ्चालनमे बटै ।
