लगानी सम्मेलन कैबी ः मुख्यमन्त्री शाह
पहुरा समाचारदाता
धनगढी, १० कुवाँर । सुदूरपश्चिम प्रदेशके मुख्यमन्त्री कमलबहादुर शाह सुदूरपश्चिम प्रदेशमे लगानी बढैना प्रदेश सरकारसे लगानी सम्मेलन आयोजना कैना बटैले बटै ।
कैलाली हार्डवेयर व्यवसायी संघके आयोजना करल हार्डवेयर एक्स्पो उद्घाटन कार्यक्रममे उहाँ उ बाट बताइल रहिट । उहाँ प्रदेश सरकारसे चालु आर्थिक वर्षमे ओकर लाग बजेट समेत विनियोजन करसेकल जानकारी डेलै । उहाँ प्रदेशमे उद्योग नानेक लाग यिहे आर्थिक वर्षमे लगानी सम्मेलन कैना बटैलै । उहाँ उद्योगीहुकनहे सुदूरपश्चिम प्रदेशमे उद्योग सञ्चालन कैना आव्हानफे करले बटै ।
उहाँ प्रदेश सरकारसे लगानी करे चाहल उद्योगीहुकनहे प्रदेश सरकारसे सदा साथ डेना बटैटी व्यवसायीहुकनके समस्या समाधानके लाग समेत पहल कैना जनैलै । मुलुक आर्थिक मन्दीमे रहल बटैटी मुख्यमन्त्री शाह सुदूरपश्चिम प्रदेश सरकारसे यी अवस्थामेफृे प्रदेश सरकारसे रियालिस्टिक बजेट ल्यानल बटैलै । अपन स्रोतहे सहि अनुमान करके बजेट ल्यानल बटैटी उहाँ प्रदेश सरकारसे आर्थिक समस्या समाधानके लाग कुछ मजा अभ्यास थालनी करसेकल बटैलै ।
नेपाल उद्योग वाणिज्य महासंघ प्रदेश उपाध्यक्ष अनिलकुमार भोजानिया सरकारसे निर्माण व्यवसायीहे भुक्तानी नइडेहल कारणसे हम्रे हार्डवेयर व्यवसायीसेफे लगानीके रिटर्न पाई नइसेकल बटैलै । उहाँ कहलै, ‘हम्रे निर्माण व्यवसायीहे बैंक ग्यारेन्टीके आधारमे सामान उधारो डेहल हुई । सरकारसे निर्माण व्यवसायीहे भुक्तानी डेहलपाछे केल निर्माण सामाग्री व्यवसायीसे निर्माण व्यवसायीसे भुक्तानी पाई सेकी ।’
सुदूरपश्चिम प्रदेश निर्माण व्यवासायी महासंघके अध्यक्ष लक्ष्मणकुमार स्वाँर सरकारसे २० लाखके बजेट विनियोजन करके २० करोडके ठेक्का लगाडेना करल ओरसे सरकारसे निर्माण व्यवसायीहुकनहे रकम भुक्तानी डेहे नइसेकल बटैलै । उहाँ महासंघसे सम्बन्धित सक्कु निकायमे पहल कैनाके साथे एक चरणके आन्दोलन समेत करसेक्लेसेफे निर्माण व्यवसायीसे भुक्तानी पाई नइसेकल बटैलै ।
सरकारके नीतिके कारण सक्कु खालके व्यवसायीसे समस्यामे परल नेपाल उद्योग वाणिज्य महासंघके केन्द्रीय सदस्य तथा कैलाली उद्योग वाणिज्य संघका अध्यक्ष पुष्पराज कुँवर बटैलै । ‘व्यवसायीहुकनहे राहत डेना खालके कौनोफे तहके सरकारसंग नीति नइरहल कारण आर्थिक समस्या निम्तल बा,’ अध्यक्ष कुँवर कहलै, ‘सरकारसे करउप्पर कर केल थप्न काम करटी रहल बा । यिहीसे व्यवसायी पलायन हुइना अवस्था आइल बा ।’
अम्बे स्टिल्स् प्रालिके अध्यक्ष शोभाकर हरि न्यौपाने हार्डवेयर व्यवसायीसे भोग्टी रहल समस्या उद्योगसेफे भोगे परटी रहल बटैलै । उहाँ व्यवसायीके समस्या राष्ट्रिय मुद्दाके रुपमे आघे आइल ओरसे सरकारसे यिहीहे समाधान करे पर्ना बटैलै ।
हार्डवेयर एक्स्पो २०८० शुरु
निर्माण सामाग्रीके व्यवसाय प्रबद्र्धन कैना ओ प्रयोगकर्ताहे एक्के छानाटरे सक्कु निर्माण सामाग्रीबारे परामर्श डेना उद्देश्यके साथ धनगढीमे हार्डवेयर एक्स्पो २०८० शुरु हुइल बा ।
कैलाली हार्डवेयर व्यवसायी संघके आयोजना करल एक्स्पो सुदूरपश्चिम प्रदेशके मुख्यमन्त्री कमलबहादुर शाह बुधके उद्घाटन करले बटै । कुवाँर १४ गतेसम सञ्चालन हुइना एक्स्पोमे स्थानीय, राष्ट्रिय ओ अन्तराष्ट्रिय निर्माण सामाग्री उत्पादक कम्पनीके ५५ ठो स्टल धारल बा ।
प्रयोगकर्ताहे निर्माण सामाग्रीके गुणस्तर, छनोट ओ प्रविधि लगायतके विषयमे सचेतना तथा परामर्श उ स्टलसे लेहे सेक्ना व्यवस्था करल संघके अध्यक्ष कुबेर शाही बटैलै । उहाँ एक्स्पो अवधिमे सञ्चालन कैना टमान खालके सेमिनारसे प्रयोगकर्ता, उत्पादक ओ व्यवसायीबीचके अन्तरक्रिया मार्फत् निर्माण सम्बन्धी नीति, प्रविधि ओ सामाग्रीके विषयमे छलफल कैना बटैलै । उद्घाटन समारोह बाहेक बुधके पाँच सयसे ढेर प्रयोगकर्ता एक्स्पो अवलोकन करले बटै ।
एक्सपोसे सुदूरपश्चिम प्रदेशमे लगानी कैना उद्योगीहुकनहे प्रोत्साहन कैनाके साथे मार्केट मापन कैना सहयोग कैना संघके निवर्तमान अध्यक्ष सुरेन्द्र राठी बटैलै । निर्माण सामाग्रीके भारी मार्केटके रुपमे सुदूरपश्चिम प्रदेश उदय हुसेकल बटैटी उहाँ विकास निर्माण सम्बन्धी नीति निर्माताहे समेत एक्स्पोसे वेयफरवार्ड कैना बटैलै ।
उद्घाटन समारोहसे पहिले धनगढीमे प्रभातफेरी आयोजना करल रहे । उद्घाटन पश्चात अम्बे स्टिल्स्के अध्यक्ष न्यौपानेके मोटिभेसनल क्लास सञ्चालन करल रहे । करिब डेढ सय जाने प्रयोगकर्ता ओ व्यवसायीके सहभागितामे करल मोटिभेसनल क्लासमे अध्यक्ष न्यौपाने निर्माण सामाग्रीके छनौट विधि, निर्माण प्रविधि ओ विजनेश प्रोमोसनके विषयमे अपन अनुभव ओ नोलेज शेयर करले रहिट ।
