हेल्फ फर हेप्पिनेससे दृष्टि फाउन्डेसनहे सहयोग
पहुरा समाचारदाता
धनगढी, १२ कुवाँर । सामाजिक संस्था हेल्प फर हेप्पिनेस सुदूरपश्चिमसे धनगढीके दृष्टि फाउन्डेसनमे आश्रितहुकनहे सहयोग करटी वार्षिकोत्सव मनैले बा ।
हेप्पिनेससे बिफेक रोज फाउन्डेसनमे आश्रित सडक मानव महिला तथा बालबालिकाके सहयोगार्थ खाद्यान्न, शैक्षिक सामाग्री ओ गरम लुगा हस्तान्तरण करटी आठौं वार्षिकोत्सव मनाइल हो ।
दृष्टि फाउन्डेसनमे हेल्प फर हेप्पिनेसके सुदूरपश्चिम प्रदेश संयोजक घनश्याम भण्डारीके अध्यक्षतामे आयोजित कार्यक्रमके प्रमुख अतिथि फाउन्डेसनके अध्यक्ष कल्पना भट्ट रहल रहिट । संयोजक भण्डारी दृष्टि फाउन्डेसनमे आश्रित महिला तथा बालबालिकाहे शैक्षिक सामाग्री, खाद्यान्न ओ गरम लुगा हस्तान्तरण करल बटैलै ।
भण्डारीसे विगतसे संस्था खुसी नइपुगल ठाउँमे खुसी पुगैना उदेश्य अनुसार काम करटी रहल बटैले बा । साथे, सहयोगके लाग सक्कुहुनहे धन्यवाद समेत डेले बटै ।
फाउन्डेसनके अध्यक्ष भट्टसहितके चार जनहनहे सम्मान वार्षिकोत्सवके अवसरमे हेल्प फर हेप्पिनेससे दृष्टि फाउन्डेसनके अध्यक्ष कल्पना भट्ट सहितके चार जनहनहे सम्मान करले बा । दृष्टि फाउन्डेसन नामक संस्था सञ्चालन करके सडक मानवहुकनहे आश्रय डेके समाजहे महत््वपूर्ण योगदान करल कहटी प्रशंसा पत्रसहित अध्यक्ष भट्टहे सम्मान करल हो ।
ओस्टेक, वर्ष भरमे संस्थामे सर्वोत्कृष्ट कार्य करल कहटी असहाय कोषके सदस्य तथा बैतडी संयोजक भरत विष्ट, हेप्पिनेसके सदस्य आरती दाहाल ओ निरज पाठकहेफे सम्मान करल हेप्पिनेस जनैले बा ।
दाहाल वर्षभरके सर्वोत्कृष्ट सदस्यके रूपमे, पाठक असहाय कोषहे बल्गर बनैना भूमिका खेलल ओृ विष्टहे इमर्जेन्सी रक्तदानमे सक्रिय भूमिका खेलके संस्थाके गरिमा बढाइल कहटी सम्मान करल हो ।
वार्षिक प्रगति प्रतिवदेन सार्वजनिक, १४९ पिन्ट रक्तदान
वार्षिकोत्सवके अवसरमे हेल्प फर हेप्पिनेस सुदूरपश्चिमसे वर्ष भरर सम्पादन करल कामके प्रगति विवरण समेत सार्वजनिक करल बा । संस्थाके प्रदेश संयोजक घनश्याम भण्डारी दृष्टि फाउन्डेसनमे आयोजित औपचारिक कार्यक्रम बीच वार्षिक प्रतिवेदन सार्वजनिक करल हुइट । भण्डारी एक वर्षके अवधीमे प्रदेशके टमान अस्पतालमे ८३ जाने बिरामीके लाग ८९ पिन्ट इमर्जेन्सी रगत व्यवस्थापन करटी दान करल बटैलै । उहाँक अनुसार इमर्जेन्सीके ८९ सहित वर्ष भरके १४९ पिन्ट दान करल बा ।
रक्तदान जीवनदानके नाराहे सफल बनैना कुछ हदसम सफल हुइल बटैटी उहाँ अइना दिनमे समेत निरन्तरता डेना जनैलै ।
स्वास्थ, शिक्षा, ट्राफिक नियमलगायतके सामाजिक ओ राष्ट्रिय महत्वके विषयमे जनचेतनामुलक कार्यक्रमके आयोजना करल बा । छाडा पशु चौपायाके निःशुल्क औषधी उपचार कैना कार्यक्रममे निरन्तरता डेटी १६२ पशुके उपचार करल बा ।
९ जाने बिरामीके उपचारमे सहयोग करल, सौभाग्य अस्पतालसंग सम्झौता करके हेप्पिनेसके सदस्यहे उपचारमे विशेष छुट करल, डिप्रेसनके शिकार हुइल ९ जनहनहे काउन्सिलिङ करके मानसिक स्वास्थ सेवा डेहल भण्डारी सार्वजनिक करल प्रतिवेदनमे उल्लेख करल बा ।
फेसबुक लाइभसे जनचेतनामुलक सन्देश प्रवाह, अवस्था हेरके निःशुल्क एम्बुलेन्स सेवा उपलब्ध करैना कार्यहे निरन्तरता डेहल, गरिब तथा जेहेन्दार विद्यार्थीहे छात्रवृत्ति डेना, स्वास्थ सेवा सुधारके लाग खबरदारी कैना, सरोकारवालाहे सल्लाह सुझाव डेना कामहे समेत निरन्तरता डेहल प्रतिवेदनमे उल्लेख करल बा ।
