कैलारी गाउँपालिका स्वास्थ्य शाखा कार्य सम्पादनमे दुसरा स्थानमे

पहुरा समाचारदाता
धनगढी, १५ कुवाँर । कैलालीके गौरीगंगा नगरपालिकाके स्वास्थ्य शाखा कार्य सम्पादनमे उत्कृष्ट बनल बा ।

आर्थिक वर्ष २०७९÷८० के कार्य सम्पादनमे कैलारी गाउँपालिका, गोदावरी नगरपालिका ओ जानकी गाउँपालिका दुसरा स्थानमे आइल बा । कलेसे धनगढी उपमहानगरपालिका ओ टीकापुर नगरपालिका टिसरा स्थानमे आइल बटै ।

स्वास्थ्य कार्यालय कैलालीके आयोजनामे हुइल वार्षिक समीक्षा कार्यक्रममे ओइनहे जिल्ला समन्वय समितिके कार्यवाहक प्रमुख खगराज भुसाल प्रशंसा पत्र वितरण करके सम्मानित करल रहिट ।

ओस्टेक करके स्वास्थ्य कार्यालयमे कार्यरत चार जाने कर्मचारीहे सम्मानित करल बा । सम्मानित हुइलमे कार्यालय सहयोगी रामबहादुर थापा, अहेव गणेश साउद, कम्प्युटर अपरेटर ईश्वरी भट्ट ओ क्षयरोग निरीक्षक देवीदत्त जोशी रहल बटै । ओस्टेक कैलारी गाउँपालिका बसौती स्वास्थ्य चौकीमे कार्यरत सि.अ.हे.व पदमे कार्यरत रहल बालीचरण कठरियाहेफे सम्मान कैगिल बा ।

साथे पालिकाके स्वास्थ्य शाखा प्रमुख, पालिकासे सिफारिस करल उत्कृष्ट कर्मचारी, विकास साझेदारी संघ संस्था लगायतहे सम्मानित करल बा । समीक्षा कार्यक्रममे सामाजिक विकास मन्त्रालयके जनस्वास्थ्य प्रमुख नरेन्द्र कार्की, स्वास्थ्य निर्देशनालयके निर्देशक डाक्टर जगदीश जोशी लगायतके सहभागिता रहल रहे ।