सुदूरपश्चिम प्रदेशस्तरीय महिलावादी मञ्च सुरु
पहुरा समाचारदाता
धनगढी, २५ कुवाँर । सुदूरपश्चिम प्रदेश स्तरीय महिलावादी मञ्च २०८० विफेक रोजसे धनगढीमे सुरु हुइल बा । ‘न्याय, समानता ओ पर्यावरणीय अधिकारके सुनिश्चितता ः सामाजिक रुपान्तरण सहितके दिगो विकासमे सुनिश्चितता’ कना मूल नारा सहित यिहे कुँवार २५ गतेसे २६ गतेसम दुइदिन हुइटी रहल उदघाटन कार्यक्रमके वडका पहुना उद्योग पर्यटन वन तथा बातावरण मन्क्री रमेश धामी रहल रहिट ।
कार्यत्रममे महिला अधिकारकर्मी तथा ओरेक नेपालके संस्थापक अध्यक्ष डा. रेणु अधिकारी नेपालमे नेता बन्ना आधार लिङ हो की का ? कहटी प्रश्न करले रहिट । महिलाके नेतृत्वहे मानलपाछे केल रूपान्तरण हुइना उहाँक कहाई रहे । ‘हमार यी देशमे नेता बन्ना आधार लिङ नै हो ?,’ उहाँ प्रश्न करटी कहली,‘महिलाके नेतृत्वहे मानलपाछे केल रूपान्तरण हुई टबकेल महिला नेतृत्वमे अइही ।’ उहाँ आजकाल्ह ढेर ठाँउमे महिलाके आवाज सुने लागल बटैली ।
अब फेर महिला संगठित हुके समुदायसे संघसम आगी बारे पर्नामे महिला अधिकारकर्मी अधिकारी जोड डेली । उहाँ समाजमे रुपान्तरण नइहुइलेसे दिगो विकासके लक्ष्य समेत पूरा नइहुइना बटैली ।
पहिल महिलावादी योगमायाहे सम्झटी उहाँ समाजमे असमान शक्ति सम्बन्ध रहल ओरसे अभिन विभेद रहल बटैली । उहाँ सक्कु बाटमे समानता हुई पर्ना तर्क करली । ‘काममे समानता, हेराइमे समानता हुई परल । भात पकैना छोट हुइना, हर जोत्न ओ कमैना भारी हुइही कना नइहो । हम्रे सक्कु एक हुई ओ सक्कु समान बटी,’ उहाँ कहली ।
कार्यक्रममे महिलाके श्रमके अधिकार, शरीर ओ पर्यावरणीय न्याय, मानवीय संकट ओ महिलाके नेतृत्वके सवालमे प्यानल छलफल हुइना जानकारी डेहल बा । कार्यक्रममे प्रदेशके ९ जिल्लाके ८८ पालिकाके महिला जनप्रतिनिधी, महिला मावन अधिकार रक्षक, महिला अधिकारके क्षेत्रमे काम करुइया संघसंस्थाके प्रमुख, स्थानीय सरकारके पदाधिकारी, सञ्चारकर्मी ओ महिला अधिकारकर्मीहुकनके सहभागिता रहल बा । कार्यक्रम आजसम चल्ना बा ।
