यूएईहे ७ विकेटसे हरैटी नेपाल विजयी
काठमाडौं, १ कार्तिक । यूएईहे ७ विकेटसे पराजित कैटी नेपाल त्रिकोणात्मक श्रृखलामे सुखद सुरुवात करले बा ।
मुलपानी क्रिकेट मैदानमे यूएईसे डेहल १४१ रनके लक्ष्य नेपाल कप्तान रोहितकुमार पौडेलके अर्धशतकसँगे १८.५ ओभरमे ३ विकेट गुमाके भेटाइल हो । ५१ रन जोरेबर ३ विकेट गुमाके नेपालके लाग कप्तान रोहितकुमार पौडेल ओ दीपेन्द्र सिंह ऐरीे अविजित १२९ रनके साझेदारी कैटी जित डेहुवाइल हुइट । पौडेल ५१ ओ ऐरी ३४ रनमे अविजित रहलै ।
इहीसे आघे टस हारके ब्याटिङके नेउटा पाइल यूएइ वसिल हमिदके अर्धशतकके मदतमे निर्धारित २० ओभरमे ७ विकेट गुमैटी १४० रन बनाइल रहे ।
ओकर सुरुवात खराब रहे । टी–२० अन्तर्राट्रियमे डेब्यू करल विकेट किपर खलिद शाह पहिल ओभरके अन्तिम बलमे डक आउट हुइलै कलेसे अलिशान सराफू ६ रनमे आउट हुइल रहिट ।
५४ रन जोरेबर ४ विकेट गुमाइल यूईएके पारी ओ वसिल हमिदसे सम्हर्ना प्रयास करलै । डुनुजाने पाँचौं विकेटके लाग ५६ रनके साझेदारी करल रहिट । नसिर ३२ रनमे आउट हुइल रहिट ।
ओकरपाछे फेन आक्रमण पारी खेलल् हमिद अन्तिम ओभरके पहिल बलमे आउट हुइनासे आघे अर्धशतक पुरा करलै । ३६ बलमे ५० रन बनाइल उहाँ ५१ रनमे आउट हुइल रहिट । आसिफ खान १२ रन बनैलै कलेसे औरे जाने दोहोरो अंकमे रन जोरे नैसेक्लै ।
नेपालके लाग करण केसी सर्वाधिक ३ विकेट लेहल रहिट । गुल्सन झा २ ओ सोमपाल कामी ओ अविनाश बोहोरा समान १–१ विकेट लेहल रहिट ।
