वातावरण संरक्षण सम्बन्धी छलफल कार्यक्रम
पहुरा समाचारदाता
धनगढी, ११ कार्तिक । इन्सेक प्रदेश कार्यालयके आयोजनामे प्रदेशस्तरीय वातावरणीय मानवअधिकार रक्षक संजाल वीच वातावरण संरक्षण सम्बन्धी छलफल कार्यक्रम हुइल बा ।
मानव अधिकार रक्षक संजाल प्रदेश सयोजक सावित्रा आचार्यके अध्यक्षतामे हुइल प्रदेशस्तरीय वातावरणीय मानवअधिकार रक्षक संजाल वीच शुकके रोज वातावरण संरक्षण सम्बन्धी छलफल कार्यक्रममे सहजीकरण इन्सेक प्रदेश संयोजक खडकराज जोशी करल रहिट । छलफल कार्यक्रममे वहाँ पछिल्का समयमे जलवायू परिवर्तनके असरसे पानीके मुहान सुख्टी रहल, अनावृष्टि, अतिवृष्टि हुइटी जिहीसे मानव स्वास्थ्यमे नकारात्मक असर परटी रहल बटैलै ।
कञ्चनपुरके महाकाली सुगर मिल ओ भागेश्वर सुगर मिलसे निकरल राशयानसे पारल नकारात्मक असरके विरुद्ध सक्कु ओरसे आवाज उठैना आवश्यक रहलफे संयोजक जोशी बटैलै । अब्बेक समयमे ढेर उत्पादनके लोभमे रासायानिक मल, विषादीके प्रयोगसे मानव लगायत जीव जन्तुहुकनके असर परटी रहल मने ओकर न्यूनिकरणके लाग केक्रो ध्यान नइपुगल उहाँ बटैलै । प्लाष्टिकहे व्यवस्थित रुपमे व्यवस्थापन कैनाके सट्टा जथाभावि जरैलक कारण मानव स्वास्थ्य भारी असर परटी रहल उहाँ बटैलै । प्लाष्टिक, रासायनिक मलके कारण क्यान्सर, मुटु, दम, उच्चरक्तचापके समस्या रहल विमारीके संख्या बह्रलफे उहाँ बटैलै ।
फियान नेपालके सुदूरपश्चिम प्रदेश संयोजक मुकुन्द राना स्थापना हुइल उद्योग कलकरखाना व्यवस्थित रुपमे संचालन नइकरलपाछे वातावरणमे असर परटी रहल मने ओकर अनुगमनके कमी रहल बटैलै । उहाँ कहलै, ‘जौन ठाउँमे उद्योग संचालन हुइल बा, उ ठाउँके स्थानीय वातावरणमे कैसिन असर परठ उ बारे सचेत हुइना जरुरी बा ।’ उद्योगीहुक्रे स्थानीयके मुह बन्द करेक लाग छोट छोट विकास करेहस लगानी करल मने ओकर सट्टा भारी लाभ लेटी रहठै, उहाँ कहलै, ‘उद्योग व्यवसाय मापदण्ड अनुसार संचालन नइहुइलपाछे वातावरणमे असरबारे कोई नइसचेत हुइठै ।’
जोगबुढामे बनफाडानी, क्रेसर उद्योग संचालनपाछे वहाँ ढेर बाढ पहिरो गैलफे उहाँ बटैलै । उद्योगी व्यवसायी आर्थिक चलखेल डेखाके दोहन करटी रहलफे बटैलै । कञ्चनपुरके महाकाली सुगर मिल ओ भागेश्वर सुगर मिल फिल्टर जडान नइकरल, ओ मिलसे उत्पादन हुइल रासायन व्यवस्थापन नइकरलपाछे उ क्षेत्रमे भारी असर परल संयोजक राना बटैलै । कञ्चनपुर विपद व्यवस्थापन समितिसे मिलहे फिल्टर जडानके लाग पत्रचार करल ओ उ मिलके कारण पारल असरके प्रतिवेदन सम्बन्धित मन्त्रालयमे पठाइल बटैलै ।
ओस्टेक करके प्रदेशस्तरीय वातावरणीय मानवअधिकार रक्षक संजालके संयोजक सावित्रा आचार्य कामके व्यवस्ततासे काठमाण्डौं बैठल ओरसे संजालके संयोजकके जिम्मेवारी गोविन्द प्रसाद सापकोटा ओ उपसंयोजकके जिम्मा नरदिप धामीहे डेगिल बा । ओस्टेक करके इन्सेक प्रदेश संयोजक खडकराज जोशीके संयोजकत्वमे सल्लाहकार समितिफे गठन कैगिल बा । जेकर सदस्यमे देवी खनाल (गैसस महासंघ), सावित्रा आचार्य( मानव अधिकार रक्षक संजाल घोडाघोडी, मुकुन्द राना (फियान नेपाल), प्रेम चौधरी (नेपाल पत्रकार महासंघ कैलाली) रहल बटै । कार्यक्रमके संचालन संजालके सचिव कैलाश पनेरु करल रहिट ।
प्रदेशस्तरीय वातावरणीय मानवअधिकार रक्षक संजाल वीच वातावरण संरक्षण सम्बन्धी छलफल कार्यक्रम सजालके सदस्य रुपेश खरेल, मानबहादुर चौधरी, सोमनाथ राना, शारदा राना, कमला चौघरी, इन्सेकके फोकल पर्सन राजकुमार चौधरी, हरिसिंह विकलगायतके सहभागिता रहल रहे ।
