बालाजीसे सम्झौता विपरित बहाल बिटौरीकर रकम संकलन

उप–महानगरपालिकासे तीन दिनभिटर विवरण पेश कैना निर्देशन

पहुुरा समाचारदाता
धनगढी, १३ कार्तिक । बालाजी कन्स्ट्रक्सन धनगढी, कैलालीसे सम्झौता विपरित बहाल बिटौरीकर रकम संकलन करल कहटी धनगढी उप–महानगरपालिकासे तीन दिनभिटर विवरण पेश कैना निर्देशन डेले बा ।

आर्थिक वर्ष २०८०÷०८१ के लाग धनगढी उप–महानगरपालिका, नगर कार्यपालिकाके कार्यालय, धनगढीसे संकलन कैना आन्तरिक आयओरसे बहाल बिटौरीकर संकलन कैना ठेक्काके सम्झौता करलमे पट्टा–पूर्जीमे तोकल बहाल बिटौरीके किसिममे उल्लेख नइहुइल साईकल, मोटरसाइकल ओ पैदल दुध, तरकारी तथा कवाडके सामानके व्यवसाय कैना व्यक्तिसंग अवैध रुपमे वहाल बिटौरीकर संकलन करल नगरपालिका जनैले बा ।

टमान संचार माध्यम ओ व्यक्तिसे गुनासो प्राप्त हुई आइल ओरसे पट्टापूर्जीमे उल्लेख नइहुइल साईकलमे टिना व्यवसाय कैना किसान, मोटरसाइकल ओ पैदल व्यवसाय कैना व्यक्तिसे बहाल बिटौरीकर संकलन नइकैना उपमहानगरपालिका सचेत करैले बा । आबसे यैसिन कार्य करल पैलेसे धरौटी बाफत पेश करल बैंक ग्यारेन्टी जफत करके ठेक्का तुरना उपमहानगरपालिका जनैले बा । ओस्टेक करके आजके मितिसम उप्पर उल्लेखित व्यक्तिसे का कटरा बहाल बिटौरीकर रकम संकलन करल बा ओकर विवरण ३ (तिन) दिन भिटर कार्यालयमे पेश कैना निमित्त प्रमुख प्रशासकीय अधिकृत नरेन्द्र बहादुर खाती निर्देशन डेले बटै ।