सुदूरपश्चिममे डेंगु संक्रमित १३ सय पुग्लैं
कैलालीमे ६४० ओ कञ्चनपुरमे २७६ जाने संक्रमित
पहुरा समाचाचारदाता
धनगढी, १३ कार्तिक । सुदूरपश्चिम प्रदेशमे अभिनफे डेंङगु संक्रमणदर उच्च डेखल बा ।
सुदूरपश्चिम प्रदेश सामाजिक विकास मन्त्रालय स्वास्थ्य निर्देशनालय डोटीसे सार्वजनिक करल दैनिक रिपोर्ट अनुसार सुदूरपश्चिम प्रदेशमे अभिन डेंङगु रोग संक्रमणदर उच्च डेखल हो । प्रदेश नौ जिल्लामे अब्बेसम १३ सय जाने डेङगु सक्रमित पुगल निर्देशनालय जनैले बा ।
दैनिक रिपोर्ट अनुसार कैलाली, कञ्चनपुरमे संक्रमणदर उच्च डेखल सुदूरपश्चिम प्रदेश सामाजिक विकास मन्त्रालय स्वास्थ्य महाशाखा प्रमुख नरेन्द्रसिंह कार्की जनैलै । कैलालीमे अक्टुवर २० तारेखसम २११ जाने ओ कञ्चनपुरमे १०० जनहनहे डेंङगु रोग संक्रमण डेखल बा । कलेसे अब्बेसम कैलालीमे ६४० जाने ओ कञ्चनपुरमे २७६ जाने पुगल बटै । जार महिना सुरुवाट हुइ लागलपाछेफे मच्छरके कमी नइआइल ओरसे अभिन डेङगु रोग लग्नासे सचेतना अपनैना महाशाखा प्रमुख कार्की बटैलै । गैल महिनामे प्रदेशमे ३३० जहनमे संक्रमण डेखलमे अक्टुवरमे २९ तारेख अँटवारसम ३३५ जाने पुगल बटै ।
डेङगु संक्रमण सुदूरपश्चिमके पहाडी जिल्लामे अभिनफे डेखा परल रहल निर्देशनालयके तथ्याङकमे डेखल बा । जेम्ने अक्टुवर महिनामे बाजुरामे १० जाने, बैतडीमे ११ जाने ओ अछाममे ३ जनहनमे डेङगु रोग संक्रमण डेखल रहे । सुदूरपश्चिमके बाजुरामे अब्बेसम ६८, बझाङमे १३, दार्चुंलामे १९६, बैतडी २२, डडेल्धुरा १०, डोटी १९, अछाममे ५६ जनहनमे डेंङगु रोग संक्रमण डेखल रहे ।
नेपालमे सन् २००४ मे पहिल चो चितवन जिल्लामे विदेशी नागरिकमे डेंगु रोग पाइल रहे । सन् २००६ मे पहिल चो नेपालमे डेंगु रोग प्रकोपके रुपमे देखा परल रहे । नेपालमे वि.सं. २०६१ सालसे डेंगु रोग विल्गैना सुरु पश्यात प्रत्येक वर्ष यी रोग कब महामारीके रुपमे टे कबु छिटफुट रुपमे डेखा पर्ना करल बा ।
२०२२ मे ५४ हजार ७८४ जनहनमे (२०७९ साल वैशाख महिनासे डेंगु रोगके विरामीके संख्यामे वृद्धि हुके भदौ कुवाँर कार्तिक हुइटी पुसमहिना सम देशभर झन्डै ५५ हजार से ढेर संक्रमण हुके ८८ जानेक मृत्यु हुइल बा । उ अवधीमे सुदुरपश्चिम प्रदेशमेफे डेंगु ढेर देखा परल रहे । कैलाली जिल्लामे ४३२ जनहनमे डेंगु रोग देखा परल रहे । ओ ३ जानेक मृत्युफे हुइल बा । कैलाली आर्थिक वर्ष २०७६–७७ मे ४१, २०७७–७८ मे १०१ ओ २०७८–७९ मे १९८ जनहनमे डेगु पुष्टि हुइल रहे ।
डेंगु एडिस एजेप्टाई ओ एडिस एल्वौपेक्टस नामक मच्छरके कटाईसे हुइना तीव्र भाइरल संक्रमण हो । यी भाइरस डेंगु १, डेंगु २, डेंगु ३ ओ डेंगु ४ करके चार मेरिक रहठै । एडिज मच्छर करिया रंगके रहठै, जेम्ने उज्जर थोप्लाफे विल्गाइठ । यी मच्छर विशेष करके दुपहर कटना करठै ।
औलो उत्पन्न कैना मच्छर फोहर पानीमे पैना हुइलेसेफे डेंगु सर्ना मच्छर टमान दिनसे हलचल नइहुइल स्वच्छ पानीमे अण्डा परठै । डेंगु रोग क्लासिक डेंगु, हेमोरेजिक ओ साक सिन्ड्रोम करके तीन मेरिक रहठै । क्लासिक डेंगु सामान्य प्रकारके डेंगु हो । यी अपनही निको हुइठ, मृत्युके सम्भावना कम रहठ । मने यदि कौनो व्यक्तिहे डेंगु हेमोरेजिक ज्वरो वा डेंगु साक सिन्ड्रोम हुइल बा कलेसे यकर उचित मेरिक उपचार नइकरलेसे मृत्यु हुई सेकठ ।
जुरी घटैना सिटामोल खाई परठ ओ प्रशस्त झोल पदार्थ खाई परठ । मने जुरी घटैना कहिके एस्पीरीन तथा आईबुप्रोफेन भर खाई नइपरठ । डेंगु जुरी विरुद्धके खोप तथा खास उपचार समेत नइहरल ओरसे मच्छरके कटार्ईसे बच्न यी रोगके बचावटके मुख्य उपाय हो ।
