मोहना घाटमे छठ पूजाके तयारी
पहुरा समाचारदाता
धनगढी, २ अगहन । धनगढीके मोहना घाटमे छठ पूजाके तयारी पुरा हुइल बा । छठमे पूजा करे अयइयाके लाग कैलालीके मोहन घाटमे टेन्ट निर्माण, बिजुली बत्ती ओ रातके लाग जाग्रमस्थल निर्माण कार्य पुरा हुइल समितिके अध्यक्ष सन्तोष मण्डल जानकारी डेलै ।
शनिच्चरके रोज पत्रकार सम्मेलनके आयोजना करटी आयोजकसे मोहन घाटमे हरेक वर्ष पूजा कैना भक्तालुके संख्या बढ्ना क्रम रहल बटैलै । इ बरस एक लाखसे ढेर भक्तजन मोहना घाटमे आके छठ पूजा कैना छठ पूजा समितिके अध्यक्ष मण्डल बटैलै । “धनगढीमे छठ पर्व मनुइयाके सख््या हरेक बरस बह्रटी रहल बा । इ बरस मोहना छठी घाटमे करिब एक लाख भक्तजनके सहभागिता रहना अनुमान करले बाटी ।,” मण्डल कहलै ।
छठी पूजाके परम्परा महाभारतकालसे सुरु हुइल विश्वास करजाइठ् । सूर्य पुत्र कर्णसे भगवान् सूर्यहे हरेक सकारे जलमे उठके अर्घ्य डिट कना महाभारतमे वर्णन करल बा ।
ओस्टके, भगवान रामके रावणउपर विजय पश्चात् रामराज्य स्थापनार्थ कात्तिक शुक्ल षष्ठीके दिन सूर्यदेवके आराधना करल विश्वास करजाइठ् । पाण्डव पत्नी द्रौपदी फेन आपन परिवारके उत्तम स्वास्थ्यके कामना ओ दीर्घायुके लाग नियमित सूर्य देवताके पूजा करल विश्वास करजाइठ् । सूर्यदेवताके इहे पूजा कालान्तरमे छठ पर्वके रूपमे मनाइ लागल मैथिली समुदायमे विश्वास करजाइठ् । छठ पर्व पूर्ण रूपसे कृषि उत्पादनसँग सम्बन्धित पर्व हो । इ पर्वमे स्थानीय उत्पादन, सीप ओ संस्कारके सम्मिश्रण पाजाइठ् । स्थानीय समुदायसे हातसे बनाइल बाँसके सुप्पा, कनसुप्ती, माटीसे बनाइल सामग्री, ढकना, सरबा ओ दियाजैसिन सामग्रीके प्रयोग छठ पूजामे हुइना करल बा ।
अस्टैटी सूर्य ओ उदैटी सूर्यहे जल चढैनाके साथे छठी मैयाँके पूजा आराधना छठ पर्वके मुख्य विशेषता रहल बा ।
छठ पुजाके उदघाटन सुदूरपश्चिम प्रदेशके मुख्यमन्त्री कमल शाहसे कैना आयोजक जनैले बा । छठ पूजा सेवा समितिके आयोजनामे हरेक वर्ष मोहन घाटमे पूजा कार्यक्रम हुइटी आइल बा ।
भगवान् सूर्यके पूजा आराधना कैना यी पर्व विधिवत् रूपमे कार्तिक शुक्ल चतुर्थीसे चार दिनसम विधिपूर्वक मनाजाइठ । छठके पहिल दिनहे अरबा–अरबाइनफे कहठै ।
व्रतालुसे भोजनमे मच्छरी, लसुन, प्याज, कोदो, मसरी जैसिन खाद्यान्न परित्याग करके आजके दिनसे व्रत बैठना परम्परा बा । छठ पर्व अत्यन्त श्रद्धा ओ भक्तिपूर्वक मनजाइठ । तराई मधेशमे महत्वके साथ मनैना धार्मिक एवम् लोकआस्थाके पर्व छठ मनाजाइठ ।
तराई मधेसमे उल्लासके साथ मनैना यी पर्वमे परिवारके सक्कु सदस्यहे नयाँ कपडा लगैना ओ मीठ परिकार खैना करठै । सन्तान प्राप्ति, रोग निदान ओ पारिवारिक कल्याणके लाग तराई मधेसमे धुमधामसंग मनैना छठ पर्व पछिल्का दिनमे देशभर मनाई लागल बा । छठ मनैना यी बेला तराईके गाउँसहरमे रहल पोखरी, लडिया, तलाउ जैसिन जलाशयके सरसफाइ कैना, सिरना, क्रम सुरु हुुसेकल बा ।
