मोहना घाटमे छठके रौनक
पहुरा समाचारदाता
धनगढी, ३ अगहन । कैलाली जिल्लास्थित धनगढीके मोहना घाटमे छठके रौनक सुरु हुइल बा । छठ पर्वके मुख्य दिन अँटवारके रोज अस्टैटी सूर्यके पूजा आराधना करके अर्घ्य डेहल बा । छठमे पूजा करे अयइयाके लाग कैलालीके मोहन घाटमे टेन्ट निर्माण, बिजुली बत्ती ओ रातके लाग जाग्रमस्थल निर्माण करल बा ।
छठ उदघाटन कार्यक्रम सुदूरपश्चिम प्रदेश सरकारके मुख्यमन्त्री कमलबहादुर शाह रहल रहिट । ओस्टेक विशिष्ट पहुनामे भौतिक पूर्वाधार मन्त्री प्रकाश बहादुर देउवा, उद्योग पर्यटन, वन वातावरण मन्त्री रमेश धामी, धनगढी उपमहानगरपालिकाके नगर प्रमुख गोपाल हमाल रहल रहिट । ओस्टेक पहुनामे कैलालीके प्रमुख जिल्ला अधिकारी युवराज कट्टेल, सहायक प्रजिअ यज्ञराज जोशीलगायत धनगढी उपमहानगरपालिकाके टमान वडाके अध्यक्षहुकनके सहभागिता रहल रहे ।
कार्यक्रम छठ पूजा समितिके अध्यक्ष सन्तोष मण्डलके अध्यक्षतामे हुइल रहे । छठी पूजाके परम्परा महाभारतकालसे सुरु हुइल विश्वास करजाइठ् । सूर्य पुत्र कर्णसे भगवान् सूर्यहे हरेक सकारे जलमे उठके अर्घ्य डिट कना महाभारतमे वर्णन करल बा ।
ओस्टके, भगवान रामके रावणउपर विजय पश्चात् रामराज्य स्थापनार्थ कात्तिक शुक्ल षष्ठीके दिन सूर्यदेवके आराधना करल विश्वास करजाइठ् ।
पाण्डव पत्नी द्रौपदी फेन आपन परिवारके उत्तम स्वास्थ्यके कामना ओ दीर्घायुके लाग नियमित सूर्य देवताके पूजा करल विश्वास करजाइठ् । सूर्यदेवताके इहे पूजा कालान्तरमे छठ पर्वके रूपमे मनाइ लागल मैथिली समुदायमे विश्वास करजाइठ् । छठ पर्व पूर्ण रूपसे कृषि उत्पादनसँग सम्बन्धित पर्व हो । इ पर्वमे स्थानीय उत्पादन, सीप ओ संस्कारके सम्मिश्रण पाजाइठ् । स्थानीय समुदायसे हातसे बनाइल बाँसके सुप्पा, कनसुप्ती, माटीसे बनाइल सामग्री, ढकना, सरबा ओ दियाजैसिन सामग्रीके प्रयोग छठ पूजामे हुइना करल बा ।
अस्टैटी सूर्य ओ उदैटी सूर्यहे जल चढैनाके साथे छठी मैयाँके पूजा आराधना छठ पर्वके मुख्य विशेषता रहल बा । छठ पूजा सेवा समितिके आयोजनामे हरेक वर्ष मोहन घाटमे पूजा कार्यक्रम हुइटी आइल बा । भगवान् सूर्यके पूजा आराधना कैना यी पर्व विधिवत् रूपमे कार्तिक शुक्ल चतुर्थीसे चार दिनसम विधिपूर्वक मनाजाइठ । छठके पहिल दिनहे अरबा–अरबाइनफे कहठै ।
व्रतालुसे भोजनमे मच्छरी, लसुन, प्याज, कोदो, मसरी जैसिन खाद्यान्न परित्याग करके आजके दिनसे व्रत बैठना परम्परा बा । छठ पर्व अत्यन्त श्रद्धा ओ भक्तिपूर्वक मनजाइठ । तराई मधेशमे महत्वके साथ मनैना धार्मिक एवम् लोकआस्थाके पर्व छठ मनाजाइठ ।
तराई मधेसमे उल्लासके साथ मनैना यी पर्वमे परिवारके सक्कु सदस्यहे नयाँ कपडा लगैना ओ मीठ परिकार खैना करठै । सन्तान प्राप्ति, रोग निदान ओ पारिवारिक कल्याणके लाग तराई मधेसमे धुमधामसंग मनैना छठ पर्व पछिल्का दिनमे देशभर मनाई लागल बा । छठ मनैना यी बेला तराईके गाउँसहरमे रहल पोखरी, लडिया, तलाउ जैसिन जलाशयके सरसफाइ कैना, सिरना, क्रम सुरु हुुसेकल बा ।
