धनगढीके ४ वडामे ‘एकीकृत मोबाइल एप’ सुरु

पहुरा समाचारदाता
धनगढी, ९ अगहन । धनगढीके चारठो वडामे ‘एकीकृत मोबाइल एप’ सुरु हुइल बा । जिआइजेडके सहयोगमे धनगढी उपमहानगरपालिका वडा नम्बर ३, ११, १६ ओ १८ मे एकीकृत मोबाइल एप सुरु हुइल हो ।

एपमे स्थानीय सरकारसे सम्प्रेषित सम्पूर्ण सूचनाके जानकारी, घरहीसे नगरवासी आपन समस्या तथा गुनासा सिढे जनप्रतिनिधीसँग राखे सेक्ना, आपन व्यक्तिगत कागजात अपलोड कैके भण्डारण करे सेक्ना जिआइजेडके जीवन श्रेष्ठ बटैलै ।

ओहकान अनुसार पालिकासे कौनो फेन समयमे जे कुहीके लाग कागजातके डिजिटल प्रतिलिपि उपलब्ध कराइ सेक्ना ओ पालिकाके सम्पूर्ण वेबसाइटके विवरणके बारेम एकीकृत रूपमे जानकारी पैना बटैलै ।

धनगढी उपमहानगरपालिकाके उपप्रमुख कन्दकलाकुमारी राना पालिकाहे प्रविधिमैत्री बनैना पहल हुइटी रहल बटैली । उहाँ उपमहानगरसे प्रवाह हुइना सेवाके बारेम सेवा ग्राही घरसे जानकारी लेहे सेक्ना व्यवस्था करे लागल बटैली । उपप्रमुख राना पालिकासे पैना सेवासुबिधाके बारेम जानकारी, पालिका ओ वडासे जारी करजैना सूचना ओ सेवा ग्राहीसे सेवाके बारेम गुनासो करे सेक्ना मेरके प्रविधिके विकास कैना लागल समेत बटैली ।