बालविवाह न्युनिकरण करटी किशोरी संजाल

पहुरा समाचारदाता
धनगढी,९ अगहन । सुदूरपश्चिम प्रदेशके टमान जिल्लामे गठन हुइल किशोरी संजालसे बालविवाह न्यूनिकरणमे अहम भूमिका निर्वाह करटी रहल बटै ।

दलित महिला अधिकार मञ्च, सम विकास, परोपकार ग्रामीण विकास, महिला विकास समाज लगायत पाँच संस्थाके आर्थिक सहयोगमे प्रदेश स्तरीय किशोरी संजालके आयोजनामे शनिच्चरके रोज धनगढीमे बालविवाह विरुद्ध किशोरीसंग हुइल २ दिने प्रदेश स्तरीय कार्याशाला गोष्ठीमे टमान जिल्लाके किशोरीहुुक्रे भारी चुनौती झेल्टी बालविवाह न्यूनिकरण करल बटैले बटै ।\\

बाजुरा जिल्लाके किशोरी संजालके धनसरा शाही अपन अनुभव सुनैटी अपन जिल्लामे औरे बरस ११८ जाने बालविवाह करलमे उहीहे न्यूनिकरण करटी यी बरस सात जनहनमे झारल बटैली । उहाँ कहली, बालविवाह रोक्ना कैगिल अभियानमे ढेर चुनौतीके सामाना करे परल बहुट जानेक गारीफे सहे परल । बाजुरा जिल्लामे ढेर बालविवाह हुइटी आइलमे संख्या कम करैना सहजुल नइरहल ।’

कैलाली जिल्लाके किशोरी संजालके गितिक सुनामफे बालविवाह रोक्न कैगिल अभियान सफल हुइल बटैली । उहाँ संजालसे ५० ठो बालविवाह रोकल बटैली ।

ओस्टेक बैतडीके मिना अवस्थी, अछामके सत्या ठकुल्लाफे बाल विवाह न्यूनिकरण लगायत तथ्याङक संकलन ओ सचेतनामुलक कार्यक्रम करटी आइल बटैलै ।

२ दिने प्रदेश स्तरीय कार्याशालाके उदघाटन कार्यक्रमके वडका पहुना सुदूरपश्चिम प्रदेशके उपसभामुख कोइलीदेवी चौधरी बालविवाह न्यूनिकरणके लाग सुरुवाट करल अभियानमे अपन ओ प्रदेश सरकारसे ओरसे सेक्टसम आर्थिक भौतिक सहयोग रहना प्रतिवद्धता जनैली ।

पुनर्वास नगरपालिकाके उप प्रमुख भुलिया राना कोई व्यक्ति कुही कौनो मेरके हिंसा नइपैना बटैली । उहाँ कहली, हिंसा करलेसे सजायके भागेदर हुई परठ कना कानून बा । कानूनके कार्यान्वयन आवश्यक बा ।

ओस्टेक कार्यक्रममे सामाजिक विकास मन्त्रालयके सचिव दानबहादुर सुनार, नेकपा एमाले प्रदेश अध्यक्ष कृष्ण प्रसाद जोशी, सामाजिक विकास मन्त्रालयके महिला बालबालिका तथा जेष्ठ नागरिक शाखाके प्रमुख जयन्ती गिरी, गैर सरकारी संस्था महासंघ प्रदेश अध्यक्ष देवी खनाल, नेपाल एकिकृत समाजवादीके चक्र विकलगायत मन्तव्य व्यक्त करल रहिट ।

प्रदेश स्तरीय किशोरी संजालके अध्यक्ष निरुता चौधरीके अध्यक्षतामे हुइल कार्यक्रममे दलित महिला अधिकार मञ्चके कार्यक्रम संयोजक विमला कडायत बालविवाह विरुद्धके संविधानमे उल्लेख हुइल कानूनी प्रवधानबारे प्रस्तुतीकरण करल रहिट ।
कार्यक्रममे टमान संघ संस्थाके प्रतिनिधि, सुदूरपश्चिम प्रदेशके टमान जिल्लाके किशारी संजालमे अवद्ध किशोरी समुहके सदस्यहुकनके सहभागिता रहल बा ।