बालविकास शिक्षाके जग होः गाउँपालिका अध्यक्ष

पहुरा समाचारदाता
हसुलिया, १० अगहन । कैलारी गाउँपालिकामे प्रारम्भिक बालविकास कार्यविधि निर्माणके लाग जनप्रतिनिधि ओ टमान शाखाके प्रमुखहुकनसे परामर्श सुरु हुइल बा ।

कैलारी गाउँपालिकाके आयोजनामे सेतो गुराँस राष्ट्रिय वालविकास सेवाके प्राविधिक सहयोग ओ यूनिसेफके सहयोगमे ‘नेपालमा प्रारम्भिक बाल शिक्षा र विकाको सवलीकरणका लागि प्रारम्भिक सिकाई तथा विका मापदण्ड कार्यान्वयन परियोजना’ अन्र्तगत स्थानीय तहमे प्रारम्भिक वाल विकास कार्यविधि निर्माण सम्बन्धी परामर्श सुरु हुइल हो ।

गाउँपालिका अध्यक्ष राजसमझ चौधरीके अध्यक्षतामे हुइल उदघाटन कार्यक्रममे उहाँ बालविकास शिक्षा जग रहल बटैलै । उहाँ कहलै, ‘प्रारम्भिक बालविकास कार्यविधि निर्माण हुइलपाछे यी गाउँपालिकाके सम्पतिके रुपमे रही । कैलारी गाउँपालिकामे सेतो गुराँस राष्ट्रिय वालविकास सेवा ओ पिसविन कैलालीसे करिब डेढ बरससे कार्यक्रम लागु करले बा । जिहीसे सामुदायिक विद्यालयमे शैक्षिक सुधार आइल बा ।’

प्रारम्भिक बालविकास कार्यविधि निर्माण हुइलेसे मार्ग निर्देशकके रुपमे रही,’ गाउँपालिका अध्यक्ष कहलै, ‘अब्बे सामुदायिक ओ संस्थागत विद्यालय विच दुरी बा । सामुदायिक विद्यालयमे मजासे पह्राई नइहुइठ कना अभिभावक जनगुनासो बा । अभिभावक मन जिटे नइसेक्गिल हो । बाल विकासके सफलता हासिल करसेकलपाछे अभिभावकके मन जिटे सेक्जाई ।’
सामुदायिक विद्यालयमे गुणस्तरीय शिक्षा नइडेठै कना मानसिकता बा, उहीहे चिरना आवश्यक बा, गाउँपालिका अध्यक्ष कहलै । कैलारीमे प्रारम्भिक बालविकास कार्यविधि निर्माण हुइलेसे ठप शैक्षिक सुधार हुइना उहाँ बटैलै ।

कार्यक्रममे कैलारी गाउँपालिकाके निमित्त प्रमुख प्रशासकीय अधिकृत तथा शिक्षा शाखा प्रमुख गणेश प्रसाद मिश्र सामुदायिक विद्यालयमे शैक्षिक सुधार हुइटी गैल बटैलै । कैलारी गाउँपालिकाके सेतो गुराँस राष्ट्रिय वालविकास सेवा ओ पिसविन कैलालीसे सुरुवाट करल गतिविधिसे बालविकास कक्षामे विद्यार्थीके सिकाई बह्रल बटैलै । उ गतिविधिसे विद्यालयमे विद्यार्थी टिकैना सहजुल हुइल बटैलै । सामुदायिक विद्यालयमे अभिभावक शिक्षाफे सुरुवाट हुइल शिक्षा शाखा प्रमुख मिश्रा बटैलै ।

कार्यक्रममे प्रारम्भिक बालविकास कार्यविधि निर्माण विज्ञ सहजकर्ता मोहन निरौला सहजीकरण करल रहिट । कार्यक्रममे उहाँ एकीकृत प्रारम्भिक बालविकास कार्यक्रम संचालन कार्यविधिके अर्थ, उद्देश्य, औचित्य ओ निर्माणके प्रक्रिया चरणबारे जानकारी डेहल रहिट ।

ओस्टेक करके छलफलके लाग कैलारी गाउँपालिकाके एकीकृत प्रारम्कि बालविकास कार्यक्रम संचालन कार्यविधि २०८० के मस्यौदा प्रस्तुत करल रहिट । ओस्टेक सेतो गुराँस राष्ट्रिय वालविकास सेवाके अनुगमन मुल्याङकन अधिकृत पदम लिम्बुफे सहजीकरण करल रहिट ।

कार्यक्रममे कैलारी गाउँपालिकाके वडा नम्बर १ के वडा अध्यक्ष धोजहरिपाल बोहरा, वडा नम्बर २ के वडा अध्यक्ष विकास चौधरी, वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ५ के वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेम बहादुर चौधरी, वडा नम्बर ८ वडा अध्यक्ष तारामल कठरिया, वडा नम्बर ९ के वडा अध्यक्ष खेमराज चौधरी, कार्यपालिका सदस्यहुक्रे, योजना शाखा प्रमुख सन्तोषकुमार चौधरी, पशु शाखा प्रमुख सूर्य प्रसाद चौधरी, महिला तथा वालबालिका शाखा प्रमुख बालकु्मारी चौधरी, पन्जिकरण शाखाके प्रमुख दयाराम चौधरी, आइटी शाखा प्रमुख रविन्द्र चौधरी, सेतो गुराँस राष्ट्रिय वालविकास सेवा कैलारी गाउँपालिका प्रमुख सुरज परियारलगायतके सहभागिता रहल बा ।

कार्यक्रमके संचालन सामाजिक विकास शाखा प्रमुख यगम कलेल करल रहिट । प्रस्तुत मस्यौदा उप्पर सोम्मारके रोजफे वृहतरुपमे छलफलपाछे कार्यविधिके रुपमे पास कैटी गाउँपालिकाहे हस्तान्तरण हुइना बा ।