खाद्यसे त्रैमासिक प्रगती सार्वजनिक

८६६ खाद्य तथा दाना नमूनाके विश्लेषण, ७ प्रतिकुल नमूना उप्पर मुद्दा दायर

पहुरा समाचारदाता
धनगढी, १२ अगहन । खाद्य प्रविधि तथा गुण नियन्त्रण कार्यालय धनगढीसे आर्थिक बर्ष २०८०÷०८१ के पहिल त्रैमासिक अवधिके प्रगती वितरण सार्वजनिक करले बा ।
खाद्य प्रविधि तथा गुण नियन्त्रण कार्यालय धनगढी ओ मातहतके खाद्य प्रविधि तथा गुण नियन्त्रण डिभिजन कार्यालय (डडेल्धुरा, डोटी ओ बैतडी)से यी आर्थिक बर्षके सावनसे कुवाँरसम कैगिल गतिविधि ओ प्रगती विवरण सोम्मारके रोज एक कार्यक्रमके विच सार्वजनिक कैगिल हो ।
पहिल त्रैमासिकमे ८६६ खाद्य तथा दाना नमूनाके विश्लेषण ओ ७ प्रतिकुल नमूना उप्पर मुद्दा दायर हुइल खाद्य प्रविधि तथा गुण नियन्त्रण कार्यालय धनगढीके प्रमुख नवराज दाहाल जनैलै ।
सुदुरपश्चिम क्षेत्रमे टमान स्रोतसे संकलन हुइ आइल खाद्य तथा दाना नमूनाके विश्लेषण सेवा कैना एक ठो प्रयोगशाला यी कार्यालय हो,’ उहाँ कहलै, ‘यी कार्यालयसे नमुना जाँच कैके रिपोर्ट पठैना ओ उद्योगमे सुधारके लाग सचेत करैना काम करटी आइल बा ।’
पहिल त्रैमासिक अवधिमे खाद्य तथा दाना अनुज्ञापत्र जारी तथा नवीकरणके लाग संकलित ६८३, अनुरोध हुके आइल ४७, बजार अनुगमनसे ऐन बमोजिम निरिक्षकसे संकलित ७७ ओ अनुसन्धानात्मक ५९ करके जम्मा ८६६ ठो खाद्य तथा दाना नमुनाके विश्लेषण करल प्रमुख बटैलै ।
खाद्य तथा दाना ऐन अनुरुप संकलन करल नमूनामध्ये प्रतिकुल पाइल नमुनाउप्पर कारबाही प्रक्रिया आघे बह्राइल बा,’ प्रमुख दाहल कहलै, ‘गैल आर्थिक बर्षसे लगत करके आइल जम्मा ३० उद्योगी व्यवसायीसंग बयान लेना, जिल्ला सरकारी वकील कार्यालयसे निर्णय निकासा लेना काम आघे बह्रल बा । यी अवधिमे अनुसन्धान प्रक्रिया पुरा हुके प्रतिकूल नमूना उपर खाद्य निरिक्षकसे जिल्ला प्रशासन कार्यालय कैलाली ओ कञ्चनपुरमे २÷२, कैलाली जिल्ला अदालतमे २, कञ्चनपुर जिल्ला अदालतमे १ करके जम्मा ७ ठो प्रतिकूल नमूना उपर मुद्दा दायर करल बा ।’
आर्थिक बर्ष २०८०÷०८१ के पहिल त्रैमासिक अवधिमे यी कार्यालयसे २९ ठो खाद्य उद्योगके दर्ता प्रकृयाके लाग सिफारिस करल, १४ ठो खाद्य उद्योग ओ १ दाना उद्योगके अनुज्ञापत्र सालबसाली नवीकरण करल, ३ ठो खाद्य ओ १ दाना उद्योगके अनुज्ञापत्र नयां जारी करल बा । यी अवधिमे खाद्य निरिक्षक तथा संयुक्त अनुगमन टोलीसे ४३ चो खाद्य तथा दाना उद्योगके अनुगमन निरिक्षण करल बा ।
घरेलु तथा साना कार्यालयमे उद्योग दर्ता हुई अइना क्रममे खाद्य तथा दाना उद्योगके हकमे यी कार्यालयधार सिफारिस लेहे पर्ना व्यवस्था रहल बा । नया उद्योग गुणस्तर लाइसेन्स अनिवार्य लेके केल उत्पादन बिक्री वितरण करे पैना ओ प्रत्येक बर्ष उ लाइसेन्स नवीकरण करे पर्ना व्यवस्था रहल बा । उद्योगके स्थलगत अनुगमन करके स्वच्छता मापदण्ड पुरा करल, उत्पादित खाद्य तथा दानाके प्रयोगशाला परिक्षण करके गुणस्तरीय प्रतिवेदन प्राप्त हुइलेसे ओ उत्पादनके लेवलमे अनिवार्य रुपसे खुलाई पर्ना विवरण उल्लेख करलपाछे उद्योगहे अनुज्ञापत्र जारी तथा नवीकरण कैना व्यवस्था रहल बा । यैसिक उत्पादन स्थलमे सुधार करके गुणस्तरीय उत्पादनमे यी कार्यालयसे टेवा पुगैटी रहल बा ।
यी अबधिमे संवेदनशिल खाद्य पदार्थ (जस्टे दूध, तेल, पानी) उत्पादन कैना उद्योग स्थलके २२ चो अनुगमन निरिक्षण करके खाद्य स्वच्छता कायम रख्ना करके आवश्यक निर्देशन डेहल बा । उ कार्य डिभिजन कार्यालय डोटी ओ डडेल्धुरासे क्रमशः २ ओ ३ चो सम्पन्न हुइल बा ।
बजारमे विकी हुइना ओ होटल रेस्टुरेन्टमे तयार कैना खाद्य पदार्थके स्वच्छता ओ गुणस्तर नियमन ओर त्रैमासिक अवधि तथा चाडपर्व लक्षित करके खाद्य निरिक्षक ओ संयुक्त अनुगमन टोलीसे जम्मा १०१ चो खाद्य बजारके अनुगमन करल बा । कलेसे ६९ चो होटल रेस्टुरेन्टके अनुगमन करल बा । यैसिक अनुगमनके क्रममे पसल तथा होटल रेस्टुरेन्टहे स्वच्छता सुधारके लाग परामर्श डेना ओ उपभोग्य अवधि समाप्त हुइल तथा गुणस्तरहीन खाद्य बस्तु जफत करके नष्ट कैना ओ आवश्यक कारवाही प्रकृया आघे बढाके नियमन कार्य करके बजार तथा होटलसे विकी हुइना खाद्य वस्तुके गुणस्तर सुधारमे टेवा पुगाइल खाद्य प्रविधि तथा गुण नियन्त्रण कार्यालय धनगढी प्रमुख दाहाल जनैलै ।
खाद्य प्रविधि तथा गुण नियन्त्रण डिभिजन कार्यालय डडेल्धुरा, डोटी ओ बैतडीसे क्रमश २०, ५० १५ चो खाद्य बजार अनुगमन ११७, ६, १० चो होटल रेस्टुरेन्टके अनुगमन करल बा । बैतडी डिभिजन कार्यालयसे १ चो दाना बजारके अनुगमन निरीक्षण कार्य सम्पन्न हुइल बा ।
खाद्य ऐन तथा दाना ऐन अनुरुप खाद्य निरिक्षण तथा दाना निरिक्षकसे उद्योग, बजार तथा होटल रेस्टुरेन्ट अनुगमन कैना क्रममे संकास्पद नमुना संकलन करके ऐन अनुरुप कारवाही प्रक्रिया आघे बह्रैटी आइल बा । यी अवधिमे यी कार्यालयसे २४ ठो नमूना ओ ३ ठो डिभिजन कार्यालय डडेल्धुरा ओ डोटीसे कमशः २५ ओ ९ खाद्य बैतडीसे २५ खाद्य दाना से ६२ ठो नमूना करके जम्मा ८६ ठो खाद्य तथा दाना नमूना संकलन करके कारबाही प्रक्रिया आघे बह्रैटी रहल बा ।
यी अवधिमे टमान माध्यमसे प्राप्त ९ ठो खाद्य स्वच्छता तथा गुणस्तर सम्बन्धीके उजुरी तथा गुनासो सम्बोधन तथा व्यवस्थापन कैना कार्य करल बा । ओस्टेक करके डिभिजन कार्यालय डडेल्धुरासे ३ ओ डोटीसे २ चो उ कार्य सम्पन्न हुइल बा ।
यी अवधिमे यी कार्यालयमे प्राप्त नमूनाके विश्लेषण दस्तुर तथा अनुज्ञापत्र जारी, नवीकरण ओ सिफारिस दस्तुर बापत रु ७ लाख ४४ हजार ४१० रुप्या राजश्व संकलन करल बा । कलेसे कार्यालयसे चालु ओ पुंजीगत खर्च करके जम्मा ७०.३४ प्रतिशत वित्तिय प्रगति हासिल करल प्रमुख जानकारी डेलै । ओस्टेक करके डिभिजन कार्यालय डडेल्धुरा, डोटी ओ बैतडीसे क्रमशः ७४.०५, ६३.२१ ओ ८७.८५ प्रतिशत वित्तिय प्रगती हासिल करल कार्यक्रममे जनागिल बा । कार्यक्रमके संचालन खाद्य अनुसन्धान निरिक्षक कुमार भण्डारी करल रहिट । कार्यक्रममे उपभोक्त हकहित संरक्षण मञ्च प्रदेश सचिव भोजराज जोशी, नेपाल पत्रकार महासंघ कैलालीके सचिव प्रेम चौधरी ओ कृषि पत्रकार मञ्चके अध्यक्ष हिमेश विक लगायत मन्तव्य व्यक्त करल रहिट ।