फूला खेतीसे एक लाख रुप्या आम्दानी

पहुरा समाचारदाता
हसुलिया १२ अगहन । कैलाली जिल्लाके कैलारी गाउँपालिकामे सामूहिक फूला खेती कैगिल बा ।

कैलारी गाउँपालिका वडा नम्बर ४ के गाउँ (मनहेरा टोल)मे पहिल चो कैगिल सामूहिक फूला खेतीमे एक लाख रुप्या आम्दानी कैगिल बा । स्थानीय ११ जाने महिला मिलन उन्नति कृषक समूह गठन कैके व्यावसायिक फूला खेती सुरुवाट कैलक अध्यक्ष रामपतिदेवी चौधरी बटैली । गाउँपालिकामे पहिल चो सामूहिक फूला खेती कैलक दाबी कैटी १२ हजारमे खरिद कैलक फूलाक टेलवासे एक लाख २ हजार आम्दानी हुइल उहाँ बटोइली । डेवारीमे केल ७५ हजारके फूला बिक्री हुइल समुहके अध्यक्ष चौधरी बटैली ।

साहस नेपाल नामक संस्थासे १२ हजारके फूलाके बिउ सहयोगमे दुई कट्टा खेतुवामे लगाइल फूलासे मजा अम्दानी हुइल बा ।
साहस नेपालके स्थानीय प्रयासमे खाद्य सुरक्षा रूपान्तरण परियोजनाके परियोजना अधिकृत नरेश चौधरी कैलाली गाउँपालिकामे फूलाके बिउ, टिन खेतीके लाग प्लास्टिक टनेल ओ गोठ सुधार कार्यक्रम लागु करल बटैलै । उहाँ कैलारी गाउँपालिकाके वडा नम्बर १,३,४,७ ओ ८ मे साहस नेपालसे सहयोग करटी आइल बटैलै । उहाँ कृषक समूहसे २५ प्रतिशत लगानी करटी आइल बटैलै ।

कर्मा ५५५ जातके सयपत्रीके फूलाके खेती करल महिलाहुक्र डसिया, डेवारीमे फुला विक्री करलै कलेसे अभिनफे विक्री करटी बटै ।