धनगढीके नीजि अस्पतालमे विपन्न परिवारके विमारीनहे निशुल्क उपचार कैना

पहुरा समाचारदाता
धनगढी, १२ अगहन । कैलाली जिल्लास्थित धनगढी उपमहानगरपालिकाभिटर रहल नीजि अस्पतालसे विपन्न, असहाय ओ वेवारिसे विमारीहुकनके निःशुल्क उपचार सेवा डेना सम्झौता हुइल बा ।

यिहे अगहन १५ गतेसे लागु हुइना कैके धनगढी उपमहानगरपालिका कैलाली ओ धनगढी उपमहानगरपालिका अन्र्तगत नीजि अस्पताल विच विपन्न, असहाय ओ वेवारिसे विमारीनहे निशुल्क उपचार सेवा डेना मंगरके रोज सम्झौता हुइल बा । उ सम्झौतामे पहिल पक्षसे धनगढी उपमहानगरपालिकाके नगर प्रमुख गोपाल हमाल ओ दुसर पक्षसे अफिन सुदूरपश्चिम प्रदेश अध्यक्ष तिर्थराज पन्त साक्षी बैठल रहिट ।

ओस्टेक करके दुसर साक्षीमे धनगढी उपमहानगरपालिकाके ओरसे प्रमुख प्रशासकीय अधिकृत रामलाल श्रेष्ठ ओ अफिनके ओरसे केन्द्रीय सदस्य जनकराज जोशी साक्षी बैठल बटै । दुई पक्षविच हुइल सम्झौतामे निजि अस्पतालसे कुल शैयाके १० प्रतिशत शैयामे निशुल्क सेवा डेना, चिकित्सक परामर्श सेवा, नर्सिङ सेवा, अक्सिजन सेवा, एक्सरे भिडियो एक्सरे सेवा, प्याथोलोजी सेवा, सक्कु औषधीके १० प्रतिशत सेवा प्रदान कैना कहिगैल बा ।

विमारीहुक्रे सेवा लेहे अइलेसे सम्बन्धित वडा कार्यालयसे सिफारिस लेके आइपर्ना कहल बा । धनगढीमे एक करिब दर्जन नीजि अस्पताल रहल बा ।