गौरीगंगामे लवाङगी पुजा तथा सांस्कृतिक कार्यक्रम सुरु
पहुरा समाचारदाता
मसुरिया, १६ अगहन । कैलालीके गौरीगंगा नगरपालिका–१० सुन्दरपुरमे शनिच्चरके रोज लवाङगी पुजा तथा सांस्कृतिक कार्यक्रम सुरु हुइल बा ।
‘भाषा, कला संस्कृति हमार पहिचान, थारु वैदिक गुरुवा प्रशिक्षण केन्द्रसंगे थारु संग्राहलय बनैना हमार अभियान’ कना मूल नारासहित आजसे लवाङगी पुजा तथा सांस्कृतिक कार्यक्रम सुरु हुइलक हो ।
लवाङगी पुजा तथा सांस्कृतिक कार्यक्रमके उदघाटन सुदूरपश्चिम प्रदेशक माननीय प्रदेश सभा सदस्य जानकी पौडेल करल रही । उदघाटन कार्यक्रममे बोल्टी उहाँ लवाङगी पुजा थारु समुदायक पहिचानसे जोरल बटैली । थारु समुदाय भूमिपुत्र ओ प्रकृतिक पुजक रहल बटैटी परम्परासे हुइटी आइल पुजाहे निरन्तरता डेना उहाँ बटैली ।
थारु गुरुवा बैदावा सेवा समिति, भलमन्सा समिति, देउथान व्यवस्थापन समिति गौरीगंगाके अध्यक्ष तिलाराम चौधरीके घरगोस्याम हुइल उदघाटन लवाङगी पुजा तथा थारु सांस्कृतिक कार्यक्रम यिहे अगहन १६ ओ १७ गते हुइना उहाँ जनैलै । पौराणिक कला, संस्कृति, भेषभुषा, भलमन्सा, गुरुवा बैदवा सोह्रिनीयाहुकनके संरक्षण तथा थारु देउथानके प्रचार–प्रसार ओ धार्मिक पर्यटन प्रवर्धनके लाग कार्यक्रम आयोजना करल अध्यक्ष तिलाराम चौधरी बटैलै ।
२०७५ सालमे स्थापना हुइल देउथानके प्रचारप्रसार ओ धार्मिक पर्यटक प्रवर्धन कैना उद्देश्यसहित सामुहिक देउथान स्थापना कैके प्रत्येक वर्ष लवाङगी पुजा ओ सांस्कृतिक कार्यक्रम कैटी आइलफे जनैलै । लवाङगी पुजा तथा सांस्कृतिक कार्यक्रमक सांस्कृतिक संयोजक दिनेश दहित दुई दिनसम सांस्कृतिक कार्यक्रम, ढाक बजैना ओ गुरुवा नाँच, रातभर देवताके फुलवार बाचन, पुजापाठ कैना बटैलै ।
उदघाटन कार्यक्रमम गौरीगंगा नगरपालिकाके नगर प्रमुख देवीदत्त कँडेल डेउथानके अधुरा भवनके लाग विगतके दिनमे सहयोग कैलक ओ सहयोगहन निरन्तरता डेना बटैलै । ओस्टेक करके कार्यक्रममे थारु कल्याणकारिणी सभाक केन्द्रीय सदस्य रामचरण चौधरी, टमानके वडा अध्यक्ष, नेपाली काँग्रेस कैलालीके उपसभापति खेमराज डगौराथारु, नुक्लीपुर गाउँके भल्मन्सा हिंगुराम चौधरी, गुरुवा परसुराम चौधरीलगागत मन्तव्य व्यक्त करल रहिट । लवाङगी पुजा तथा सांस्कृतिक कार्यक्रमम थारु समुदायक मेरमेराइक नाँचफे प्रस्तुत कैगिल बा ।
