कैलारीमे ३२ औं अन्तराष्ट्रिय अपांगता दिवस मनागिल
पहुरा समाचारदाता
हसुलिया, १७ अगहन । कैलाली जिल्लाके कैलारी गाउँपालिकामे आज ३२ औं अन्तराष्ट्रिय अपांगता दिवस प्रभातफेरी कार्यक्रम कैके मनागिल बा ।
गाउँपालिका उपाध्यक्ष भगवतीकुमारी चौधरीके वडका पहुनामे हुइल कार्यक्रममे उहाँ अपाङता रहल व्यक्तिहुकनके अधिकार सुनिश्चित करे पर्ना बटैले रहिट । अपाङता रहल व्यक्तिहुकनके यातायातमे छुट डेनाके साथे अपाङता सित रना कहलेसे कार्यान्वयन नइहुइल उहाँ बटैली ।
अपाङता रहल विद्यार्थीनहे छात्रबृतिके व्यवस्था करेपर्ना, स्थानीय तहमे बन्ना भौतिक संरचना अपाङतमैत्री बनाइपर्ना, अपाङता रहल व्यक्तिनहे दया, माया नाही अवसर डेहे पर्ना गाउँपालिका उपाध्यक्ष बटैली ।
कार्यक्रममे वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ७ के वडा अध्यक्ष दीपेन्द्रबहादुर बम, प्रमुख प्रशासकीय अधिकृत विरबहादुर ऐर लगायतके मन्तव्य व्यक्त करल रहिट । उहीसे आघे हसुलिया बजारमे ¥याली कार्यक्रमके आयोजना करल कैलारी गाउँपालिकाके महिला तथा बालबालिका शाखा प्रमुख बालकुमारी चौधरी बटैली ।
कैलारी गाउँपालिका महिला तथा बालबालिका शाखाके आयोजना तथा यहाँ रहल सक्रिया संघ संस्थाके सहकार्यमे कार्यक्रम कैगिल हो ।
