धनगढी क्रिकेट एकेडेमी ओ धनगढी स्पोर्ट्स क्लव विजयी

पहुरा समाचारदाता
धनगढी, १८ अगहन । कैलालीके धनगढीमे जारी लिटल फ्लावर प्रिमियर लिग (एलपिएल) के आठौँ संस्करण अन्तर्गत दुसरा दिन सम्पन्न दुई खेलमे धनगढी क्रिकेट एकेडेमी ओ धनगढी स्पोर्ट्स क्लब विजयी हुइल बटै ।

धनगढी क्रिकेट एकेडेमीसे कैलाली मल्टिपल क्याम्पसहे तथा धनगढी स्पोर्ट्स क्लबसे कैलाली जिल्ला क्रिकेट क्लवहे पराजित करटी प्रतियोगितामे विजयी सुरुवात करल ।

सोम्मारके पहिल खेलमे समुह ‘बि’ अन्तर्गत धनगढी क्रिकेट एकेडेमीसे कैलाली मल्टिपल क्याम्पसहे ४३ रनसे पराजित करटी प्रतियोगिताके विजयी सुरुवात करल ।

फाप्ला क्रिकेट मैदानमे निर्धारित १५ ओभरमे १२५ रनके लक्ष्य पछ्यइल कैलाली मल्टिपल क्याम्पससे पुरे ओभर व्याटिंग करलेसेफे ९ विकेट गुमाके ८१ रन केल बनाई सेकल ।

धनगढी क्रिकेट एकेडेमीके बलर निरज ऐर ४ विकेट लेटी कैलाली मल्टिपलके इनिंग्स धरासायी बनैलै । प्लेयर अफ द म्याच घोषित ऐरसे ३ ओभरमे १ मेडन ओभर फेक्टी ४ रन खर्चलैं । अनिश अवस्थी ओ मान साउद २÷२ विकेट लेलै । कैलालीके ब्याटिंगमे गणेश ऐर सर्वाधिक १७ तथा पंकज चौधरी १४ रन बनैना हेक अन्य ब्याटरसे दोहोरो अंकमे रन बनाई नइसेक्लै ।
यी आघे टस हारके ब्याटिंग करल धनगढी क्रिकेट एकेडेमीसे १५ ओभरमे ६ विकेट गुमाके १२४ रन बनाइल ।

धनगढीके लाग कप्तान विजय राना ओपनिंग ब्याटिंग करटी सर्वाधिक ४१ रन योगदान डेलेसेफे जौन क्रममे उहाँ २६ बलमे ५ चौका ओ १ छक्का प्रहार करलै । हृतिक थापासे अविजित ३७ रन बनैलै जौन क्रममे ३० बलमे ५ चौका ओ १ छक्का प्रहार करलै । निरज ऐर १० बलमे १ चौका ओ २ छक्का मद्दतसे २१ रन बनैलै । कैलालीके बलर अभिषेक कुँवर, लोकेन्द्र खनाल ओ दिप कपडेल २÷२ विकेट लेलै ।

सोम्मारके दुसरा खेलमे समुह ‘ए’ अन्तर्गत धनगढी स्पोर्ट्स क्लबसे कैलाली जिल्ला क्रिकेट क्लवहे ७२ रनसे पराजित करल । धनगढी स्पोर्ट्ससे डेहल १६७ रनके लक्ष्य पछ्याइल कैलाली जिल्लासे १५.२ ओभरमे ९४ रनमे सक्कु विकेट गुमाइल ।

कैलालीके ब्याटिंगमे दिपक टमाटासे सर्वाधिक ३३ रन तथा बिनोद नाथ ओ नरेन साउदसे समान १३ रन योगदान डेलै । बलिंगमे भोज राज भट्ट ओ दिपक चन्द ठकुरीसे ३÷३ विकेट लेलै कलेसे नारायण जोशी २ विकेट लेलै । दिपक ४ ओभरमे १ मेडन करटी १० रन तथा भोजसे ३ ओभरमे २० रन खर्चलैं । प्लेयर अफ द म्याच घोषित नारायण ३.२ ओभरमे १२ रन खर्चलैं ।
यी आघे टस जिटके ब्याटिंग करल धनगढी स्पोर्ट्स क्लवसे निर्धारित २० ओभरमे ६ विकेट गुमाके १६६ रन बनाइल ।

धनगढीके लाग ओपनर आयुष्मान बम सर्वाधिक ४५ रन बनैलै जौन क्रममे ३४ बलमे ५ चौका ओ २ छक्का प्रहार करलैं । नारायण जोशी २५ बलमे ३५ रन बनैना क्रममे ३ चौका ओ २ छक्का तथा आयुब चन्द २९ बलमे ३२ रन बनैना क्रममे ३ चौका ओ १ छक्का प्रहार करलै । ओपनिंग करल सुनिल धमला २५ रन बनैलै ।

कैलाली जिल्ला क्रिकेट संघके बलिंगमे नरेन साउद सर्वाधिक ३ विकेट लेलै जौन क्रममे उहाँ ४ ओभरमे २८ रन खचैं । राहुल केसी ओ डबल ऐर १÷१ विकेट लेलै ।

प्रतियोगिता अन्तर्गत आज मंगलबार दुई खेल संचालन हुई । पहिल खेल सकारे ९ बजे सुदूरपश्चिमांचल एकेडेमी ओ घोडाघोडी क्रिकेट एकेडेमी बीच तथा दुपहर १ बजे शुक्लाफाँटा ब्ल्याकबक्स ओ खप्तड इन्डोर बीच हुई ।

लिटल फ्लावर स्पोर्टस् क्लवके आयोजनामे सुरु हुइल प्रतियोगिताके यी आठौँ संस्करण हो । प्रतियोगिताके उपाधि विजेतासे दुई लाख ५५ हजार ओ उपविजेतासे एक लाख २८ हजार रुपैयाँ पुरस्कार पैही । प्रतियोगितामे काठमाडौँ, रौतहट, दाङ, कैलाली ओ कञ्चनपुरके करके १६ ठो टीमके सहभागिता रहल बा ।