सुदूरपश्चिम महोत्सवके तयारी पुरा, उदघाटन प्रधानमन्त्री प्रचण्डसे हुइना
पहुरा समाचारदाता
धनगढी, २१ अगहन । सुदुरपश्चिम महोत्सवके १७ औ सस्करणके रुपमे सुदूरपश्चिम महोत्सव २०८० आजसे सुरु हुइना बा । महोत्सवक आयोजक कैलाली उद्योग वाणिज्य संघसे विफेक रोज पत्रकार सम्मेलनके आयोजना करके तयारी पुरा हुइल ओ उदघाटन सम्माननिय प्रधानमन्त्री पुष्पकमल दाहाल ‘प्रचण्ड)से कैगिल जनागिल बा ।
यिहे अगहन २२ गतेसे पुस २ गतेसम धनगढी उपमहानगरपालिका वडा नं १ पशुपति टोलमे लागल महोत्सव प्रधानमन्त्रीसे दिनमे साढे १२ बजे उदघाटन हुइना तय हुइल कैलाली उद्योग वाणिज्य संघके अध्यक्ष पुष्पराज कुवँर जनैलै ।
महोत्सवमे अनुमानित ३ करोडके लगानीमे उत्कृष्ट रुपमे सम्पन्न कैजैना बा कलेसे महोत्सवमे उद्योगी व्यवसायके १० करोड बरावरके कारोबार हुइना अनुमान कैगिल बा । महोत्सवमे कृषि, जडिबुटी, हस्तकला फर्निचर, अटोमोबाइल्स, गारमेन्ट, इलेक्टोनिकल, होटल ओ सुचना प्रविधि करके ४ सय स्टल रहल बा ।
महोत्सवमे करिब ६ लाख ५० हजार व्यक्ति अवलोकन कैना अनुमान करल उहाँ जनैलै । महोत्सवहे भव्यरुपमे सम्पन्न कैना मुल समिति सहित ३० उप समिति रहल बा ।महोत्सव अवलोकनके लाग विद्यार्थीनहे रु.५० टिकटदर धारल बा कलेसे सर्वसाधारणहे रु.१०० ओ फरक क्षमता रहलहे निशुल्क करल बा ।
ओस्टेक करके आज (शुक) सकारे ८ बजे शहिद गेटसे सुरु हुइना प्रभातफेरी कार्यक्रमके आयोजनाफे कैगिल बा ।
प्रधानमन्त्रीहे १० बुँदे माग रख्ना
गौरीफन्टा (त्रिनगर भन्सार) नाकाहे सुविधा सम्पन्त अन्तर्राष्ट्रिय नाकाके रुपमे विकास करे पर्ना, प्रदर्शनी स्थलके निर्माण करे पर्ना, सुदूरपश्चिम प्रदेशमे उद्योग स्थापनार्थ प्रोत्साहन स्वरुप १० वर्षसम टयक्स फ्रि जोन धारणा करे पर्ना, विशेष औधोगिक क्षेत्रके स्थापना ओ विशेष आौद्योगिक प्याकेजके व्यवस्था करे पर्ना माग धारल बा ।
सुदूरपश्चिम प्रदेशहे चिनसंग जोरना नाका खुलाई पर्ना, पश्चिम सेती जलविद्युत आयोजना निर्माणके शिघ्र कार्यान्वयन ओ सुदूरपश्चिम प्रदेशहे लोडसेडिङ मुक्त करे पर्ना माग करल बा ।
कृषि विश्वविद्यालयके स्थापना करे पर्ना, प्रदेश सांस्कृतिक संग्रहालय निर्माण करे पर्ना, सूचना प्रविधी केन्द्रके स्थापना करे पर्ना, सेती अञ्चल अस्पतालहे सुविधा सम्पन्न क्षेत्रीय अस्पतालके रुपमे विकास करे पर्ना माग करल बा ।
