महिला तथा पुरुषके लाग बन्ध्याकरण घुम्टी शिविर

पहुरा समाचारदाता
हसुलिया, २६ अगहन । कैलाली जिल्लाके कैलारी गाउँपालिका वडा नम्बर ८ स्थित उदासीपुर प्राथमिक स्वास्थ्य केन्द्रमे मंगरके रोज महिला तथा पुरुषके लाग एक दिने बन्ध्याकरण घुम्टी शिविर हुइल बा ।

कैलारी गाउँपालिकाके समन्वयमे स्वास्थ्य कार्यालय कैलालीके आयोजना, नेपाल परिवार नियोजन संघ कैलाली शाखा, यूएनएफपीएके सहकार्यमे महिला तथा पुरुषके लाग एक दिने बन्ध्याकरण घुम्टी शिविर हुइल हो । उ शिविर गाउँपालिका उपाध्यक्ष भगवतीकुमारी चौधरीके वडका पहुनामे हुइल रहे । कलेसे विशिष्ट पहुना स्वास्थ्य कार्यालय कैलालीके नेपाल परिवार नियोजन अधिकृत ओलट नारायण चापागांई रहल रहिट ।

कैलारी गाउँपालिकाके सामाजिक विकास समिति संयोजक सन्तराम चौधरीके अध्यक्षतामे हुइल कार्यक्रममे गाउँपालिकाके स्वास्थ्य शाखा प्रमुख नरेशकुमार चौधरी, वडा नम्बर ८ के कार्यवाहक वडा अध्यक्ष लक्ष्मी चौधरी, सचिव तुल्सी चौधरीलगायतके सहभागिता रहल रहे ।

बन्ध्याकरण करुइया महिला तथा पुरुषहुकनके सम्मान स्वरुप एक थान कम्मल वितरण ओ ओइनहे घरसम एम्बुलेन्समार्फत घरसम पुगागिल रहे । उ शिविरमे २२ जाने महिला मिनिल्याप सेवा लेहल रहिट ।