नेतृत्व विकास तथा उदघोषण तालिम सम्पन्न
पहुुरा समाचारदाता
हसुलिया, २७ अगहन । कैलारी गाउँपालिकाके आर्थिक सहयोगमे श्री पूर्णागिरी क्लव कैलारी –२, बसौटीके आयोजनामे संचालित सात दिने नेतृत्व विकास तथा उदघोषण तालिम बुधके रोज सम्पन्न हुइल बा ।
कैलारी गाउँपालिका उपाध्यक्ष भगवतीकुमारी चौधरीके वडका पहुना हुइल कार्यक्रममे विशिष्ट सामाजिक विकास समिति संयोजक तथा वडा नम्बर ३ के वडा अध्यक्ष सन्तराम चौधरी रहल रहिट । समापन कार्यक्रममे बोल्टी गाउँपालिका उपाध्यक्ष भगवतीकुमारी चौधरी यूवाहुकनके लाग अब्बेक आवश्यकता अनुसारके तालिम प्रदान कैगिल बटैली । यी तालिमसे यूवाहुकनहे बोले सेक्ना बनैनाके साथे नेतृत्व विकासफे हुइल बटैली । अइना दिनमेफे नेतृत्व विकासके लाग पालिकासे बजेट विनियोजन हुइना उहाँ बटैली ।
कार्यक्रममे विशिष्ट पहुना सामाजिक विकास समिति संयोजक तथा वडा नम्बर ३ के वडा अध्यक्ष सन्तराम चौधरी नेतृत्व विकास तथा उदघोषण तालिमसे यूवाहुकन सचेत नागरिक बनैनामे टेवा पुग्ना बटैलै । उदघोषणकधे लागफे कला चाहल ओरसे सिखल सीपके सदुपयोग कैना उहाँ आग्रह करलै ।
कार्यक्रममे बसौटी गाउँ भल्मन्सा खुशीराम चौधरी तालिममे सिखल चिजहे व्यवहारमे उटरलेसे लगानीहे उपलब्धी माने सेक्ना बटैलै । ओस्टेक उहाँ बसौटी गाउँके टमान ठाउँमे चाहल होमपाइपके व्यवस्था कैडेना आग्रह करलै । कार्यक्रममे क्लवके उपाध्यक्ष आरती चौधरी, तालिमके सहभागी बासुराम चौधरी, विनिता कठरियालगायत मन्तव्य व्यक्त करल रहिट ।
क्लवके अध्यक्ष जनक चौधरीके अध्यक्षतामे हुइल कार्यक्रमके संचालन ओमविर चौधरी ओ कमला चौधरी करल रहिट कलेसे स्वागत मन्तव्य तालिममे सहभागी रामबहादुर चौधरी करल रहिट । ४८ जाने नेतृत्व विकास तथा उदघोषण तालिम लेहल रहिट । कलेसे सात दिनसम प्रशिक्षण विनिता चौधरी डेहल रही ।
