कैलारीमे सीपके आधारमे प्रमाणपत्र डेना
स्थानीय तह प्राविधि तथा व्यावसायिक शिक्षा ओ तालिम समन्वय समिति गठन
पहुरा समाचारदाता
हसुलिया, २७ अगहन । कैलारी गाउँपालिकासे सीपके आधारमे सीप रहल व्यक्तिनहे प्रमाणपत्रके व्यवस्था कैना हुइल बा ।
सामाजिक विकास मन्त्रालय सुदूरपश्चिम प्रदेश अन्र्तगत कार्यान्वयनमे रहल राष्ट्रिय व्यावसायिक योग्यता प्रणाली अन्र्तगत स्थानीय तहमे टीभिइटी समन्वय समिति गठन कैगिल बा । समितिके संयोजकमे प्रमुख प्रशासकीय अधिकृत, रोजगार संयोजक, रोजगारदाता संस्था मध्येसे सम्बन्धित स्थानीय तहसे तोकल एक जाने महिलासहित दुई जाने सदस्य, प्रमुख शिक्षा क्षेत्र हेर्ना महाशाखा प्रमुखहे सदस्य सचिव रहल बटै ।
बुधके रोज गाउँपालिका उपाध्यक्ष भगवतीकुमारी चौधरीके अध्यक्षतामे हुइल बैठकमे उहाँ गाउँठाउँमे ढेर जाने कौनो ना कौनो काम करटी रहल ओरसे ओइनहे सीपके आधारमे प्रमाणपत्रके व्यवस्था कैना बटैली । उहाँ कहली, सीप सिखल प्रमाणपत्र रहलेसे देश विदेशके कौनोफे ठाउँ जाके काम करे सेक्ही । थारु समुदायके प्राय जैसिन व्यक्तिफे आजकाल्ह टमान सीपसे पोख्ट बटै, मने प्रमाणपत्र नइहुईन । गाउँपालिकासे आब तालिम संचालन करी ओइनके सीपके आधारमे प्रमाणपत्रके व्यवस्था करी ।
सुदूरपश्चिम प्रदेश सामाजिक विकास मन्त्रालयके नेपाल व्यावसयिक योग्यता प्रणाली परियोजनाके प्राविधक अधिकृत टंकप्रसाद उपाध्याय कार्यक्रममे सहजीकरण करटी पुस महिनामे सूचना निकारके सीप रहल व्यक्तिनहे तालिममे सहभागी करंैटी लेवल बह्रैना ओ टीभिइटी प्रमाणपत्रफे डेना बटैलै ।
आर्थिक बर्ष २०८०÷०८१ सालमे सुदूरपश्चिम प्रदेशमे पूर्व सिकाईके मान्यता विधि अन्र्तगत बिल्डीङ पेन्टर तह–२, सेल मोवाइल फोन रिपेयर टेक्निसियन तह–२, कम्प्युटर हार्डवेयर एण्ड नेटवर्क टेक्निसियन तह–२, कन्स्ट्रसन मेसन तह–२, प्लम्बर तह–२, रेफ्रिजेरेटर एण्ड एअर कन्डिसन मेकानिक तह–२, टाइल मार्बल फिटर तह–१, ओ गार्मेट फेब्रिकेटर तह–१ के व्यावसायके सीप परिक्षण कैना उहाँ बटैलै ।
कार्यक्रममे वडा नम्बर ३ के वडा अध्यक्ष सन्तराम चौधरी, वडा नम्बर ४ के वडा अध्यक्ष ठागुराम चौधरी, वडा नम्बर ५ वडा अध्यक्ष विष्णु प्रसाद चौधरी, वडा नम्बर ६ के वडा अध्यक्ष प्रेमबहादुर चौधरी, वडा नम्बर ७ के वडा अध्यक्ष दिपेन्द्रबहादुर बम, प्रमुख प्रशासकीय अधिकृत विर बहादुर ऐर, शिक्षा शाखा प्रमुख गणेश प्रसाद मिश्र, सामाजिक विकास अधिकृत यगम कलेल, योजना शाखा प्रमुख सन्तोष चौधरी, रोजगार शाखा प्रमुख नितु भण्डारीलगायत जनप्रतिनिधि, कर्मचारी, शिक्षकहुकनके सहभागिता रहल रहे ।
