नवजीवन सहकारी संस्थाके ३० औं वार्षिक साधारणसभा सम्पन्न
पहुरा समाचारदाता
धनगढी, ३० अगहन । धनगढीमे नवजीवन सहकारी संस्था लिमिटेडके ३० औं वार्षिक साधारणसभा तथा वार्षिकोत्सव समारोह सम्पन्न हुइल बा ।
शनिच्चर धनगढीके रुवस होटेलम एक औपचारिक कार्यक्रम करके संस्थासे ३० औं बार्षिक साधारणसभा सम्पन्न करल हो । संस्थाके सेयर सदस्य, संचालक समिति, पूर्व कार्यसमिति सदस्य, संस्थापक सेयर सदस्य ओ संस्थाके कर्मचारीके उपस्थितिमे ‘केक’ काटके वार्षिकोत्सव मनाइल हो ।
वि.स २०४९ सालमे सामुदायिक विकास कोषसे नवजीवन सहकारी संस्थाके सुरुवाट हुइल रहे । वि.स २०५० अगहन ३० गतेसे नवजीवन सहकारीके नामसे विधिवत रुपमे संस्थाके सुरुवात हुइल रहे । ६४ जाने संस्थापक सेयर सदस्यसे सुरुवात हुइल नवजीवन सहकारी संस्थामे हाल ३२ हजार ९ सय ७५ सेयर सदस्य रहल बटै । कलेसे हाल संस्थाके सेयर पुँजी २८ करोड २४ लाख पुगल बा । जगेडा तथा कोषमे ५५ करोड ५४ लाख पुगल बा ।
हाल संस्था ४ अर्ब ४१ करोड ४५ लाख बचत संकलन करके ३ अर्ब ९१ करोड ४६ लाख बराबर रिण लगानी करल कैना सफल हुइल संस्थाके अध्यक्ष देवबहादुर बम बटैलै । संस्थामे २७ प्रतिशत तरलता रहल बा । आर्थिक बर्ष ०७९÷८० मे नवजीवन सहकारीसे १२ करोड ४८ लाख मुनाफा हासिल करल अध्यक्ष बम जानकारी डेलै ।
संस्थासे सेयर सदस्यहुकनहे लाभांशके अलवा संरक्षित पुँजी फिर्ता कोषसे समेत रकम उपलब्ध करैटी आइल बा । यी बर्ष उ कोषसे २ करोड १९ लाख रकम सदस्यहुकनके बचत तथा कर्जाके अनुपातमे वितरण कैना जनाइल बा । सेयर सदस्यसे बचत करल आधारमे ४० प्रतिशत ओ ऋण लेहल सदस्यके खातामे ६० प्रतिशतसे हुइ अइना रकम जम्मा कैना अध्यक्ष बम बटैलै ।
गोदावरी नगरपालिकामे संस्थासे डेढ बिघा जमिनमे गोदाम घर निर्माण करके धान संकलन करटी आइल बा । भविष्यमे कुटानी, पिसानी ओ पेलानीके लाग मिल संचालन कैना प्रक्रिया आघे बढासेकल बताइल बा । गैल बर्ष संस्थासे ४ हजार ८ सय कुन्टल धान खरिद करके बिक्रि करेबेर १६ लाख मुनाफा कमाइल रहे ।
निकट भविष्यमे सहकारीसे नवजीवन ब्राण्डके चामल उत्पादन कैना तयारी करटी रहल बताइल बा । संस्थासे सम्बन्धित निकायसे अनुमति लेसेकल ओरसे नवजीवन ब्राण्डके चाउर विक्रि कैना धान खरिद कैना काम हुइटप् रहल संस्थाके अध्यक्ष बम जानकारी डेलै ।
