कैलारी ७ मे अध्यक्ष कपके लाग वडा स्तरीय टीम छनौट सुरु
पहुरा समाचारदाता
हसुलिया, १ पुस । कैलारी गाउँपालिका अध्यक्ष कपमे भाग लेहल लाग अँटवारसे वडा नम्बर ७ मे वडास्तरीय टिम छनौटके प्रतियोगिता सुरु हुइल बा ।
गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्रबहादुर बमके वडका पहुनाहे हुइल कार्यक्रममे उहाँ बल हस्तान्तरण करके प्रतियोगिताके उदघाटन करल रहिट । कार्यक्रममे सम्बोधन करटी उहाँ खेलाडी देशके गहना रहल बटैटी राज्यसे खेलकुद क्षेत्रमे लगानी बह्रैना आवश्यक रहल बटैलै ।
कार्यक्रममे विशिष्ट पहुना सुन्दरीदेवी चौधरी रहल रही । संरक्षण यूवा क्लवके आयोजनामे हुइल कार्यक्रम क्लव समन्वय समितिके अध्यक्ष विष्णु चौधरीके अध्यक्षतामे हुइल रहे । प्रतियोगितामे फुटवल, भलिवल ओ व्याडमिन्टन खेल हुइना बा ।
वडा स्तरीय छनौट प्रतियोगिताके उदघाटन खेलमे यूवा क्लव, गाउँक भल्मन्सा,सुरक्षकर्मी, खेलप्रेमी यूवाहुक्रनके सहभागिता रहल रहे । कार्यक्रमके संचालन मञ्जु चौधरी करल रही ।
