प्रगतिशिल सामुदायिक वनके ३०औं वार्षिक साधारणसभा
जीवन चौधरी
भजनी, २ पुस । कैलालीके भजनी नगरपालिका–४ धनौरामे रहल प्रगतिशिल सामुदायिक वनके ३०औं बार्षिक साधारणसभा तथा सावजानिक सुनुवाई सम्पन्न हुइल बा ।
सामुदायिक वनके अध्यक्ष दिपक चौधरीके घरगोस्यामे हुइल कार्यक्रममे वडका पहुना सुदूरपश्चिम प्रदेशसभा सदस्य घनश्याम चौधरी रहल रहिट । कार्यक्रममे उहाँ प्रदेशसे बनुवाके कानून बनाई पर्ना बटैलै ।
कार्यक्रममे विशिष्ट पहुना भजनी–४ के वडा अध्यक्ष जन्ताराम चौधरी रहल रहिट । कार्यक्रममे उहाँ सामुदायिक वनके भवन निर्माणके लाग वडा कार्यालयसे पहल कैना बटैलै ।
कार्यक्रममे सव डिभिजन वन कार्यालय भजनीके वन रक्षक प्रकाश विक सामुदायिक वनके पदाधिकारी असुरक्षित रहल बटैलै । उहाँ कहलै, तमान संगठनसे चन्दा आंतांकसे सामुदायिक वन परिसान रहल बटै । भजनी नगरपालिका स्तरीय सिएफसीसीके अध्यक्ष खोजराज चौधरी सामुदायिक वनभिटर टलुवा सामुदायिक वनभिटर नानेक लाग स्थानीय तहसे पत्रचार करटी रहल बटैलै ।
भजनी नगरपालिका स्तरीय सिएफसीसीके पूर्व अध्यक्ष विजयराज श्रेष्ठ सामुदायिक वन मेहनत करुइयाके लाग सिकाई ओ स्वागतसँगे सेवा सत्कार कैना क्षेत्रमे रहल बटैलै । प्रगतिशिल सामुदायिक वनके पूर्व अध्यक्ष तिलकराम चौधरी नीति नियम अनुसार काम करलेसे पारदार्शिता नाने सेक्ना बटैलै ।
पहुरा दैनिकके पहलमानपुर सम्वादाता सामुदायिक वनहे पहुराके मायाके चिन्हा प्रदान करल रहिट । कार्यक्रममे थारु महालोक गायक मनिराम चौधरी गीत मार्फत वन, जगल, चिरैचुरङगन संरक्षणके सन्दे डेहल रहिट ।
यिहे अवसरमे विपन्न बालबालिकाहुकनहे सम्मान स्वरुप झोला, कापी, डटपेन वितरण कैगिल बा । ओस्टेक करके पत्रकार, बुद्धिजीवि, समाजसेवीहुकनफे कदरपत्रसे सम्मान कैगिल बा ।
कार्यक्रममे सामुदायिक वनके सचिव आशारानी चौधरी ८ लाख ९५ हजार ४१८ रुप्या १६ पैसा बराबरके आयव्यय प्रस्तुत करल रहिट । कार्यक्रममे स्वागत उपाध्यक्ष बेलसरा साउद ओ संचालन देशु चौधरी करल रहिट ।
