अन्तराष्ट्रिय तेक्वान्दोमे सुदूरपश्चिमके खेलाडी जिटलै सबसे ढेर स्वर्ण
पहुरा समाचारदाता
धनगढी,४ पुस । भारतके उत्तराखण्ड स्थित देहरादुनमे हुइल सातौं अन्तर्राष्ट्रिय तेक्वान्दो च्याम्पीयनसीपमे सुदूरपश्चिमके खेलाडी सबसे ढेर स्वर्ण पदक जिटले बटै । च्याम्पीयनसीपमे दुसरा स्थान हासिल करल नेपालके लाग सबसे ढेर सुदूरपश्चिम प्रदेशके खेलाडी स्वर्ण पदक जिटल हुइट ।
प्रतियोगितामे सहभागी हुइल सुदूरपश्चिम प्रदेशके कौनोफे खेलाडी पदक विहीन नइरहल नेपाल तेक्वान्दो संघ सुदूरपश्चिम प्रदेश समिति जनैले बा । प्रतियोगितामे भारत पहिल बनेबेर नेपालसे २८ स्वर्ण सहित दुसरा स्थान हासिल करलमे सुदूरपश्चिमके खेलाडी ७ स्वर्ण जिटले बटै ।
नेपालसे ७० जाने खेलाडी सहभागी हुइलमे २८ स्वर्ण पदकमे सबसे ढेर पदक सुदूरपश्चिमके ७ जाने खेलाडी जिटल हुइट ।
स्वर्ण पदक जित्न सुदूरपश्चिमके खेलाडीमे भुवन सार्की, पुर्णिमा भट्ट, हसिना राना, सोमु नेपाली, अनिष धामी, अस्मिता विक ओ दिपा राना रहल बटै ।
सुदूरपश्चिमसे सहभागीता जनाइल ११ खेलाडीमध्ये ७ जाने स्वर्णउप्पर कब्जा जमाईबेर तीन जाने रजत ओ एक जाने कास्य पदक जिटल तेक्वान्दो प्रशिक्षक श्रीराम चौधरी जानकारी डेलै । उहाँक अनुसार भीम धामी, विकास चौधरी ओ साईरा खड्का रजत पदक जिटेबेर क्षितिज चौधरी कास्य पदक जिटल हुइट ।
