भादा महोत्सव पुस १७ गतेसे
पहुरा समाचारदाता
धनगढी, ५ पुुस । कैलाली जिल्लाके धनगढी उपमहानगरपालिका वडा नम्बर १६ थारु गाउँ भादामे थारु समुदायके परम्परागत संस्कृति संरक्षणसंग्गे होमस्टे प्रवद्र्धनके लाग महोत्सव आयोजना हुइना जनागिल बा ।
विफेक रोज धनगढीमे पत्रकार सम्मेलनके आयोजना कैके थारु होमस्टे गाउँ भादा पर्यटन विकास तथा व्यवस्थापन समितिसे विशेष कैके थारु जातीके परम्परागत संस्कृति,खानपान, भेषभुुसा, सीपकलाके प्रचार प्रसारके लाग यिहे पुस १७ से २२ गतेसम महोत्सवके आयोजना करे लागल अध्यक्ष लक्ष्मी नारायण चौधरी बटैलै ।
महोत्सव आयोजनासे थारु जातिनके पहिचानहे पर्यटन व्यवसाय मार्फत राष्ट्रिय अन्तर्राष्ट्रिय स्तरमे पुगाइक लाग होमस्टे कार्यक्रम एवं थारु होमस्टे गाउँ भादा महोत्सव आयोजना करे लागल अध्यक्ष बटैलै ।
थारु होमस्टे गाउँ भादा महोत्सवके मुख्य आकर्षणके रुपमे प्रत्येक दिन स्थानीय तथा राष्ट्रिय कलाकारसे थारु नाचगान प्रस्तुती, थारु खानपान, थारु सीप तथा भेषभूषा, थारु देउथानके अवलोकन भ्रमण, थारु संग्रहालय अवलोकन, रमाइलो मेला, फोटो प्रदर्शनी रहल बा । महोत्सवमे भलिवल प्रतियोगिता समेत कैना जनागिल बा । करिब १९ लाखके लागतमे लग्ना महोत्सवहे १ लाख मनै अवलोकन कैना अनुमान करल बा । महोत्सवके निशुल्क रुपमे अवलोकन करे सेक्ना समितिके अध्यक्ष बटैलै ।
महोत्सवहे भव्यताके साथ सम्पन्न करेक लाग एक ठो मुल समिति ओ ९ ठो उपसमिति गठन करलफे उहाँ बटैलै ।
थारु गाउँ भादामे १९ घरमे होमस्टे संचालन कैके थारु समुदायके कला, संस्कृति, खानपानहे राष्ट्रिय अन्तर्राष्ट्रियस्तरमे चिन्हैना प्रयास कैटी आइलफे पत्रकार सम्मेलनमे उहाँ जानकारी डेलै ।
संरक्षण सम्वद्र्धनके लाग सक्कुजन करी काम, संस्कृति भेष भूषा राखी हमार पहिचान कना मुल नाराके साथ लग्ना महोत्सव पुष २२ गतेसम चल्ना ओ अवसिक ११ औं संस्करणके थारु होमस्टे गाउँ भादा महोत्सव धनगढी उपमहानगरपालिका वडा नम्बर १६ भादा गाउँके दिपेन्द्र चारपाते माध्यामिक विद्यालयके खेलमैदानमे लग्ना आयोजक जनैले बा ।
