देवरिया सामुदायिक वनके २०औं वार्षिक साधारण सभा सम्पन्न

पहुरा समाचारदाता
धनगढी, ७ पुस । कैलालीके धनगढी उप–महानगरपालिका–७ देवरिया स्थित देवरिया सामुदायिक वन उपभोक्ता समुहके २० औं वार्षिक साधारण सभा शनिच्चरके रोज निम्जल बा ।

समुहके अध्यक्ष शारदा प्रसाद रानाके अध्यक्षतामे हुइल कार्यक्रममे वडका पहुना जिल्ला वन कार्यालयके प्रमुख राम चन्द्र कँडेल रहल रहिट । कार्यक्रममे सम्बोधन करटी उहाँ वन उपभोक्तासे वन समुहहे सहयोग करलेसे बल्गर हुइटी जैना बटैलै । जौन सामुदायिक वनके पदाधिकारी, उपभोक्ताहुक्रे मजा बटै, उ सामुदायिक फडको मरटी गैल उहाँ बटैलै ।

डगरमे रुखुवाके कारण दुर्घटना हुइटी रहल बा,’ उहाँ कहलै, ‘ढेर मनै अकाल गुमैले बटै । ओकर कारण दिनदिने दुर्घटनाफे बह्रल बा । आब डगरेम पर्ना रुखुवा हटाइक लाग उहीहे व्यवस्थापनके कैना पहल करबी ।’

देवहरिया सामुदायिक वन जिल्लाके उत्कृष्ट सामुदायिक वन रहटी डिभिजन वन कार्यालय कैलालीसे पुरस्कारफे डेहल उहाँ बटैलै । अइना दिनमे ठप मजा काम करटी विश्वासफे व्यक्त करलै ।

कार्यक्रममे विशिष्ट पहुना धनगढी–७ के वडा अध्यक्ष मोती रानाथारु यी वडामे टमान सामुदायिक वन रहल ओरसे आजके यी समुहके प्रस्तावित बजेटसे सामुदायिक विकास करेक लाग वडाके वजेट ओ यी समुहके बजेटहे साझेदारीमे गरिवी निवारणके लाग सीपमुलक तालिम डेहे सामुदायके विकास करे पर्ना बटैलै ।

वनमे रहल सुखल ढ्लापडा रुखहे व्यवस्थापन करलेसे सामुदायिक वनके आर्थिक स्रोतमे बृद्धि हुइना उहाँ बटैलै ।
धनगढी–७ क निवर्तमान अध्यक्ष सिताराम राना सामुदायिक वनके संरक्षण हुइल मने फाईदा हुई पर्नामे ओटरा फाइदा नइहुइल बटैलै । यी समुहमे उपभोक्ता सदस्य वृद्धि हुइटी रहल बा, उहाँ कहलै, ‘ भविष्यमे यदि वैज्ञानिक तरीकासे आघे नइबह्रलेसे यी समुहसे माग धाने नइसेकी ।’

यी समुहहे चिन्हाइक लाग ओ आर्थिकके लाग यी समूह भिटर पार्यटकीय क्षेत्र बनाई परठ । यी समुहके क्षेत्र अधिकार भिटर कौनो और व्यक्ति न आए ओ सहजुले पहिचान करे सेकीट कहिके उपभोक्ता सदस्य अपन परिचयपत्र बोक्के जंगल भिटर जाई पर्ना उहाँ बटैलै ।

सामुदायिक वन उपभोक्ता महासंघका महासचिव डण्डीराज सुबेदी सुशासन हुइल ओ उत्कृष्ट सामुदायिक वन यिहीसे और सामुदायिक वनसेफे कुछ सिखे पर्ना बटैलै । कुवाँर २६ गतेसे सर्वोच्च अदालतसे कौनो मेरिक स्थानीय सरकारहेफे कर नइतिर्ना कहिके निर्णय करले बा । वन ऐन २०७६ से गरिव विपन्न समुहहे बजेट विनियोजन करे परठ, वनहे केल लागू हुइना ओ स्थानीय सरकारहे काहे लागु नइना कहिके उहाँ प्रश्न करल रहिट ।

कार्यक्रममे वन उपभोक्ता समुहके कोषाध्यक्ष भागीराम चौधरी आ.व. ०७९÷०८० के आय व्यय ४३ लाख ३४ हजार ९ सय ४३ रुपैया ६७ पैसा बराबरके कारोबार हुइल जनैले बटै ।

आ.व. ०८०÷०८१ के अनुमानित बजेट १ करोड ५ लाख १७ हजार ५ सय ५० रुपैया बराबर रहल कहिके देवरिया सामुदायिक वन उपभोक्ता समुहके लेखा संयोजक पृथ्वी राना प्रस्तुत करले रहिट ।

कार्यक्रममे विशिष्ट पहुना सव–डिभिजन वन कार्यालय प्रमुख कृष्ण नन्द जोशी, वनस्पति अनुसन्धान केन्द्रके प्रतिनिधि कृष्ण बुढाथोकी, वडा सदस्य, समुहके पुर्व अध्यक्ष टमान संघ संस्थाके प्रतिनिधि, उपभोक्ता सदस्यके उपस्थिति रहल रहे ।
कार्यक्रममे रानाथारु, थारु समुदायके सांस्कृतिक नाच, देउडा, कविता बाचनके प्रस्तुती हुइल रहे ।

आ.व. ०७९÷०८० के प्रगति प्रतिवेदन ओ कार्यक्रम संचालन देवरिया सामुदायिक वन उपभोक्ता समुहके सचिव संगिना जगरी करल रहिट ।